Суперлиганинг 5-туридан ўрин олган «Бухоро» — «Пахтакор» (1:0) ўйини инспекторининг билдиргисига асосан, ЎФА тартиб-интизом қўмитасининг йиғилиши бўлиб ўтди.
Билдиргида ўйинга ташриф буюрган мухлислар аввалига учрашувни бошқариб бораётган ҳакамни, кейинроқ эса «Пахтакор» футбол клубини ҳақоратли сўзлар билан оммавий равишда ерга урди, деб ёзилган. Жумладан, 20, 26 ва 55-дақиқаларда ишқибозлар учрашув ҳакамини, 40 ҳамда 56-дақиқаларда эса рақиб жамоани ҳақоратлашдан тийилмаган.
Мазкур ҳолат мусобақаларни ўтказиш регламентининг 4-бўлим 5.55-бандига зиддир. Унга кўра, стадионга ташриф буюрган мухлисларнинг ҳақоратли ва камситувчи сўзларни айтишига чеклов қўйилган бўлиб, жазо сифатида келаси турни мухлисларсиз стадионда ўтиши мумкинлиги, жамоадан 3 очко олиб ташланиши мумкинлиги, клубнинг мусобақадан чиқариб юборилиши ёки 500 миллион сўмгача жаримага тортилиши эҳтимоли борлиги кўрсатиб ўтилган.
ЎФА Тартиб-интизом қўмитаси Бухоро шаҳридаги мазкур ўйин тафсилотларини ўрганиб чиқди ва «Бухоро» клубини 300 миллион сўм жаримага тортишга қарор қилган.
Шунингдек, ўйиннинг 37-дақиқасида мезбонлар вакили Шавкат Саломов бош ҳакам Темур Тўхтасиновнинг қарорига қаршилик кўрсатишга уринди. Бунда футболчи оғзаки қаршилик билан чекланмай, ҳакамнинг қўлини ҳам ушлаб олган. Шундан келиб чиқиб, Шавкат Саломов регламентнинг 5.6 бандига асосан айбдор деб топилди ва 10 миллион сўм жаримага тортилди. Мазкур ҳолатни ўз вақтида жазоламаган ҳакам Темур Тўхтасинов эса Суперлиганинг 6 ва 7-тур ўйинларига, шунингдек, Ўзбекистон Кубогининг 1/16 финал ўйинларига қўйилмайди. Бу вақт давомида у фақатгина Про-Лига беллашувларини бошқариши мумкин.
Шавкат Саломов мисолида Тартиб-интизом қўмитаси Суперлига ва Про-Лига футболчиларига эслатиб ўтади. Футбол ҳакамлари билан мулоқотга фақатгина жамоа сардорлари кириши мумкин. Аммо уларга кескин қаршилик кўрсатиш, уларга ҳалал бериш мумкин эмас. Шавкат Саломов «Бухоро» футбол клубининг сардори, бироқ келаси сафар у футбол ҳакамларга қўл теккизадиган бўлса, жазо чоралари бундан жиддийроқ бўлади, дея таъкидаланади хабарда. Шавкат Саломов юз берган ҳолатга қуйидагича изоҳ берган:
Кечаги ўйинга барча бирдек гувоҳи бўлди. Авваламбор, мен кечаги учрашувда ҳакамга нисбатан қилган қўпол ҳаракатим учун ҳакам ва қолган барчадан узр сўрайман. Тан оламан, профессионал футболчининг ишини қилмадим. Мен шунчаки тажрибали жамоадошим Артём Филипосян сариқ карточка олишини умуман хоҳламадим. Чунки унда учта сариқ карточка бор эди. Тўртинчисини олса, «Нефтчи»га қарши кечадиган сафар ўйинимизда иштирок эта олмаслигини ўйлаб, бирдан ўзимни тутиб тура олмадим. Кейинги учрашувларда бундай хатоларга йўл қўймасликка ваъда бераман ва яна бир бор барчадан узр сўрайман.Агар «Бухоро» футбол клуби раҳбарияти ўз фан-клуби ва мухлислари билан ишламаса, улар ўртасида тушунтириш ишларини олиб бормаса ва оқибатда шунга ўхшаш ҳунук ҳолатлар такрорлангудек бўлса, жазо чоралари янада жиддийроқ бўлади. Бу борада «Бухоро» клуби алоҳида, шунингдек, Суперлига ҳамда Про-Лиганинг қолган клублари ҳам «Бухоро» мисолида яна бир марта ёзма равишда огоҳлантирилади, дейилади хабарда.
Изоҳ (0)