Суперлигадаги илк истеъфо «Сўғдиёна»да: Мочинов кетди, Лушчан келди

Кеча, 7 апрель куни «Сўғдиёна» раҳбарияти навбатдан ташқари йиғилиш ўтказди, деб хабар беради «Sports.uz»

Йиғилиш давомида жамоанинг қониқарсиз натижалари муҳокама қилинди. «Сўғдиёна» Суперлиганинг 5-туридан кейин бор йўғи 1 очкони қўлга киритди. Рақиблар дарвозаси атиги 1 маротаба ишғол қилинди. Шундан келиб чиқиб, жамоа раҳбарияти Александр Мочиновни «Сўғдиёна» бошқарувига лойиқ эмас деб ҳисоблаб, истеъфога чиқарган.

Қайд этилишича, «Сўғдиёна» клубида молиявий томондан ҳеч қандай муаммо йўқ. Мураббийлар штаби ва барча футболчиларнинг ойлик маошлари ўз вақтида берилмоқда.

Бугуннинг ўзида клубга янги бош мураббий ҳам тайинланди. Сергей Лушчан «Сўғдиёна» бош мураббийи айланди, деб хабар беради клуб матбуот хизмати.

Маълумот учун 44 ёшли мутахассис мураббийлик фаолияти давомида Ўзбекистон ёшлар терма жамоаси ва «Бунёдкор» клубини бошқарган.

Бу Суперлигадаги илк истеъфодир. Аввалроқ «Қизилқум» бош мураббийи Ҳамиджон Актамовнинг истеъфоси ҳақидаги хабарлар ўз тасдиғини топмаган эди.