Кения жануби-ғарбида пайдо бўлган катта ёриқ Найроби—Нарок шоссесининг бир қисми вайрон бўлишига олиб келди. Кўп километрга чўзилган ёриқ ҳудуддаги сейсмик фаоллик натижасида пайдо бўлди, деб ёзади Tengrinews.
Рифт водийсини ҳосил қилган Шарқий Африка ёриғи 3000 километрга чўзилган бўлиб, Африка плитасини иккита тенг бўлмаган қисмга — Сомали ва Нубия плитасига бўлган, улар йилига 6—7 мм тезликда бир-биридан ажралмоқда.
138 миллион йил аввал худди шундай қитъа ёрилиши натижасида Атлантика океани пайдо бўлганди. Ўшанда Африка ва Жанубий Америка бир-биридан ажралган — ҳозиргача уларнинг қирғоқ чизиқлари бир-бирига мос келишини кузатиш мумкин. Шунга ўхшаш ҳолат Африка рифт водийсида ҳам юз бериши мумкин, шунда океан ёриқни тўлдиради, Африка қитъасининг бир қисми (Эфиопия ва Сомалини ўз ичига олувчи) катта оролга айланади.
Изоҳ (0)