Ўзбекистон Президенти Шавкат Мирзиёев Жиззах вилоятига ташрифи давомида Жиззах шаҳар Ички ишлар бўлими 2-сон ички ишлар бўлинмасида бўлди, деб хабар беради ЎзА.
Бўлинма икки қаватли бинода жойлашган бўлиб, бу ерда «Заргарлик» маҳалла фуқаролар йиғини, маҳалла посбони, профилактика инспектори хоналари ўрин олган.
Шавкат Мирзиёев маҳалла раиси ва профилактика инспектори билан аҳоли фаровонлигини ошириш, кам таъминланган оилаларни қўллаб-қувватлаш, маҳаллада жиноятчиликнинг олдини олиш масаласида суҳбатлашди.
Президентга Ички ишлар бўлинмаси томонидан ишлаб чиқилган мобил дастур ҳақида маълумот берилди.
«Жиззах ИИБ» мобил дастури аҳоли учун бепул бўлиб, фуқароларнинг мобил телефонига юкланади. Ушбу дастур орқали фуқаролар қидирувда бўлган ва бедарак йўқолган шахслар ҳақида тўлиқ маълумотга эга бўлиши, профилактика инспектори фаолиятига оид маълумотларни олиши мумкин.
Ходимларга тезкор ахборот етказиш мақсадида вилоятдаги уяли алоқа компанияси билан ҳамкорликда 2 мингда ортиқ телефон рақами тарқатилган. Мазкур қулайлик орқали тезкор ахборот этказиш имкони яратилмоқда. Яъни, навбатчилик қисмида мавжуд бўлган планшет орқали кунлик содир бўлган жиноятлар, йўл-транспорт ҳодисалари, эслатма ва янгиликлар ходимларга тезкорлик билан етказилади.
Давлат раҳбари тегишли мутасаддиларга ушбу тизимни янада такомиллаштириш юзасидан топшириқ ва кўрсатмалар берди.
Изоҳ (0)