Россия федерал архив агентлиги (Росархив) Владимир Лениннинг навбатчи шифокорлари кундаликларини махфий сақлаш муддатининг узайтирилишини шифокорлик сири билан изоҳлади, деб ёзади «Коммерсантъ».
Ҳужжатлар доҳийнинг ўлимидан кейин 75 йилга — 1999 йилгача махфийлаштирилган эди, сўнг муддат яна 25 йилга узайтирилди. 30 март, жума куни суд гериатр шифокор Валерий Новоселовнинг ҳужжатлардан махфийлик грифини олиб ташлаш ҳақидаги даъвосини кўриб чиқади. Ўтган йили у кундаликларни ўрганиб чиқиш учун олишга муваффақ бўлганди, махфийлик муддати узайтирилганидан эса у тасодифий равишда хабар топган.
Росархив «Коммерсантъ»нинг махфийлик муддати узайтирилиши сабаблари ҳақидаги сўровига жавобан, бундай илтимос билан Лениннинг жияни — укаси Дмитрийнинг қизи Ольга Ульянова мурожаат қилганини маълум қилди.
«Шифокорлик сирини сақлаш принципидан келиб чиқиб, Росархив тегишли қонунчиликка мувофиқ ҳаракат қилиб, унинг В. И. Ульянов (Ленин)нинг касаллиги ва даволаниши чоғидаги ҳужжатлардан фойдаланиш имкониятини чеклаш ҳақидаги сўровини қондиришни жоиз деб топди», — дейилади Росархивнинг жавобида.
Кундаликларнинг ошкор қилиниши, тадқиқотчилар ичида биринчи бўлиб ёзувларни ўиб чиққан гериатр шифокорнинг сўзларига кўра, Лениннинг ўлими сабаби ҳақидаги баҳсларга нуқта қўйиши мумкин. Унинг эслатишича, айни пайтда иккита версия мавжуд: инсультлар кўринишидаги клиник шаклдаги бош мия томирлари атеросклерози ва мия сифилиси. Новоселовнинг айтишича, кундаликларда ташхис йўқ, аммо беморга қандай дорилар берилгани ҳақида эслатмалар бор.
Изоҳ (0)