2018 йил 14 март куни Пискент туман ИИБга Пискент тумани Мажбурий ижро бюросида инспектор лавозимида ишлаб келган фуқаро ариза билан мурожаат қилиб, Майлабод маҳалласидаги «Почта» биноси олдига қолдириб кетган велосипедини ўғирлаб кетишганини маълум қилган. Бу ҳақда «Дарё»га Тошкент вилояти ИИБ ҳузуридаги Тергов бошқармаси хабар берди.
Маълумотларга кўра, баҳоси 500 минг сўм бўлган велосипеддан ташқари, унинг юкхонасида бўлган Pero русумли тўловларни амалга ошириш аппарати ва 92 дона МИБга тегишли тамғаларини ўғирлаб кетилган.
Олиб борилган дастлабки тергов ҳаракатлари давомида ушбу жиноятни Оҳангарон шаҳрида яшовчи, 1980 йилда туғилган эркак содир этганлиги аниқланиб, қўлга олинган.
Далилий ашё тариқасида Pero русумли тўловларни амалга ошириш аппарати ва МИБга тегишли тамғалар олинган. Велосипедни эса жиноятчи номаълум шахсга сотиб юборган.
Ҳозирда дастлабки тергов ҳаракатлари давом эттирилиб, ўғриликни содир этган шахснинг бошқа жиноятларга алоқадорлиги текширилмоқда.
Изоҳ (0)