Ҳозирда Наманган вилояти Поп туманида ижтимоий-маънавий муҳитни ўрганиш бўйича Республика ишчи гуруҳи фаолият юритмоқда. 13 та гуруҳ тумандаги 77 та маҳаллада хонадонма хонадон юриб, аҳолини муаммоларини кенг кўламда ўрганиб бормоқда, деб хабар берди ЎзА.
Жумладан, 3 ва 6-республика ишчи гуруҳлари 18 март куни Поп туманидаги «Нуробод» ва «Ултарма» маҳалла фуқаролар йиғинлари ҳудудларида бўлиб, оилалардаги ижтимоий-маънавий муҳитни ўрганиш ва аниқланган муаммоларни жойида бартараф этиш бўйича изчил ишларни олиб борди. Бир кун давомида «Нуробод» маҳалласида элликдан ортиқ хонадонда саксондан ортиқ, «Ултарма» маҳалласида 71 та хонадонга кирилиб, 34 та муаммо аниқланди.
Жумладан, кенг жамоатчилик эътиборини тортадиган айрим жиддий муаммолар ҳам аниқланди. Хусусан, 6-ишчи гуруҳга бириктирилган «Нуробод» МФЙ ҳудудидаги собиқ «Машина трактор парки» ҳудудидаги ташландиқ ва яроқсиз ҳолатга келиб қолган бинода истиқомат қилаётган Ботировлар оиласи билан суҳбат ўтказилди. Хонадонда 3 оила ва 9 нафар киши истиқомат қилмоқда.
Ўрганиш жараёнида оилабоши Мартавали Ботиров 1961 йилда туғилган бўлиб, ҳозирда фермер хўжалигида мавсумий иш билан шуғулланади.
Собиқ МТП ҳудудидаги бошқа иншоатлар ҳам нураб, қўрқинчли ҳолатга келиб қолган. Ишчи гуруҳи бу ерга борганида оила аъзоларида шамоллаш ва йўтал сабабли касаллик аломатлари яққол сезилиб турган бўлса-да, иқтисодий имконияти етарли бўлмагани учун даволанишга қурби етмаётгани ойдинлашди. Оила бекаси Шаҳринисо Эргашева 1967 йилда туғилган. Унинг айтишича, муқаддам сил касаллигига чалиниб, диспансерда уч ой давомида муолажаларни ўтказган.
Шаҳринисо Эргашеванинг паспорти 2012 йилда муддати ниҳоясига етган бўлиб, ҳанузгача алмаштирилмаган. Турмуш ўртоғи Мартавали Ботировнинг паспорти йўқолган, қайта тикланмаган.Машина трактор паркининг эски биноси ортида фуқаролар томонидан ноқонуний ташкил қилинган ва ҳеч қандай талабларга жавоб бермайдиган чиқиндихонада санитария-эпидемия ҳолати юзага келган. Атрофи очиқ ва деворлар тортилмаган турар жойда ўнга яқин дайди итлар ҳам бу ерда яшамоқда.
Икки хонали нураб ётган, дераза ойналари ўрнига турли мато парчалари, плёнкалар, ярим синган шишалар қўйилган бўлиб, қиш мавсумида ниҳоятда совиб, ёзда чидаб бўлмайдиган даражада исиб кетиши аниқланди. Яшаш биноси ичида ўчоқли ошхона жойлашган.
Кўмир ва ўтин йўқлиги сабабли, овқат пишириш ва уйни иситиш учун уй орқасидаги чиқиндихонадан болалар териб келаётган резина парчалари, майда шох-шаббалар, чўплар ёқилмоқда. Унинг заҳарли тутуни эса шундан ҳам мураккаб вазиятда яшаётган одамларнинг соғлиғига зарарли таъсир кўрсатаяпти. Ичимлик суви, табиий газ йўқ, атрофни янтоқ ва бегона ўтлар босиб ётибди.
Айниқса, 2015 йилда туғилган Отабек, 2013 йилда туғилган Баҳора, 2005 йилда туғилган Яҳёбекнинг уст-боши юпун, гигиена ҳолатларидан йироқ, касалманд ва нимжон. Уй эгаларининг айтишича, улар анчадан буён тўйиб овқатланмаган.
Оқибатда болаларнинг ижтимоий мослашувчанлиги йўқолган, мулоқот қилиш қобилияти кузатилмади, болаларга зудлик билан руҳий-психологик, маънавий ва иқтисодий, тиббий ёрдам кўрсатиш зарурлиги аён бўлди. Оиланинг даромад олиш манбаси йўқ. Оила бошлиғидан бошқа ҳеч ким ишламайди. 13 ёшли Яҳёбек 32-ўрта мактабнинг 6-синф ўқувчиси бўлиб, мактаб мутасаддилари унга қишки кийим-кечаклар олиб берган.
Аниқланишича, Поп туманининг «Маҳалла» хайрия жамғармаси томонидан мазкур оилага 2016 йил декабрда 500 минг сўм, 2017 йил 150 минг сўм ёрдам пули берилган. Хонадон аъзолари доимий рўйхатда «Чортоқ» МФЙда турса-да, амалда «Нуробод» МФЙ ҳудудида яшаётгани сабабли моддий ёрдам ёки фарзандлари учун тегишли тартибга мувофиқ нафақа пулини ололмаяпти.
«Чортоқ» МФЙ маслаҳатчиси Ҳалима Қўчқорованинг айтишича, 1995—1996 йилларда оилага 12 сотихли ер участкаси ажратилган. Аммо номаълум сабабга кўра, ушбу ер участкаси сотилиб, Поп туманидаги собиқ Халқабод шаҳарчаси ҳудудидаги кўп қаватли уйлардан хонадон сотиб олинган. Кейинчалик уни ҳам сотишган ва МТП ҳудудида қоровул бўлиб ишлаган Мартавали Ботиров оиласини бу ерга кўчириб олиб келишган.
Оила вакиллари Поп тумани 3-сектори ҳудудида бўлиб, ИИБ бошлиғи С.Абдулҳамидов улар ҳолидан бирор маротаба хабар олмаганини айтиб ўтишди. Қолаверса, паспорт муаммолари ҳам тўлиқ ҳал қилинмаган.
Поп туманида 2018 йилда уй-жойга муҳтож кам даромадли оилаларнинг 5 нафарига яшаш уйлари қуриб бериш режалаштирилган. Ваҳоланки, бу рўйхатдан мазкур оила жой олмагани аниқланди.Мазкур маҳаллага хизмат қилувчи «Исковут» қишлоқ оилавий поликлиникаси мудири Илҳомжон Анорқулов ва участка шифокори Ширмоной Ҳамралиеванинг айтишича, оиладан ҳеч ким сил касаллиги бўйича рўйхатда турмайди. Аммо, Мартавали Ботиров бир вақтлар мазкур ҳисобда турган ва соғайгани сабабли ундан чиқарилган.
Ишчи гуруҳи мазкур ҳолат бўйича тўпланган маълумотларни Республика ишчи гуруҳи штабига тақдим этди.
Изоҳ (0)