Hozirda Namangan viloyati Pop tumanida ijtimoiy-ma’naviy muhitni o‘rganish bo‘yicha Respublika ishchi guruhi faoliyat yuritmoqda. 13 ta guruh tumandagi 77 ta mahallada xonadonma xonadon yurib, aholini muammolarini keng ko‘lamda o‘rganib bormoqda, deb xabar berdi O‘zA.
Jumladan, 3 va 6-respublika ishchi guruhlari 18-mart kuni Pop tumanidagi “Nurobod” va “Ultarma” mahalla fuqarolar yig‘inlari hududlarida bo‘lib, oilalardagi ijtimoiy-ma’naviy muhitni o‘rganish va aniqlangan muammolarni joyida bartaraf etish bo‘yicha izchil ishlarni olib bordi. Bir kun davomida “Nurobod” mahallasida ellikdan ortiq xonadonda saksondan ortiq, “Ultarma” mahallasida 71 ta xonadonga kirilib, 34 ta muammo aniqlandi.
Jumladan, keng jamoatchilik e’tiborini tortadigan ayrim jiddiy muammolar ham aniqlandi. Xususan, 6-ishchi guruhga biriktirilgan “Nurobod” MFY hududidagi sobiq “Mashina traktor parki” hududidagi tashlandiq va yaroqsiz holatga kelib qolgan binoda istiqomat qilayotgan Botirovlar oilasi bilan suhbat o‘tkazildi. Xonadonda 3 oila va 9 nafar kishi istiqomat qilmoqda.
O‘rganish jarayonida oilaboshi Martavali Botirov 1961-yilda tug‘ilgan bo‘lib, hozirda fermer xo‘jaligida mavsumiy ish bilan shug‘ullanadi.
Sobiq MTP hududidagi boshqa inshoatlar ham nurab, qo‘rqinchli holatga kelib qolgan. Ishchi guruhi bu yerga borganida oila a’zolarida shamollash va yo‘tal sababli kasallik alomatlari yaqqol sezilib turgan bo‘lsa-da, iqtisodiy imkoniyati yetarli bo‘lmagani uchun davolanishga qurbi yetmayotgani oydinlashdi. Oila bekasi Shahriniso Ergasheva 1967-yilda tug‘ilgan. Uning aytishicha, muqaddam sil kasalligiga chalinib, dispanserda uch oy davomida muolajalarni o‘tkazgan.
Shahriniso Ergashevaning pasporti 2012-yilda muddati nihoyasiga yetgan bo‘lib, hanuzgacha almashtirilmagan. Turmush o‘rtog‘i Martavali Botirovning pasporti yo‘qolgan, qayta tiklanmagan.Mashina traktor parkining eski binosi ortida fuqarolar tomonidan noqonuniy tashkil qilingan va hech qanday talablarga javob bermaydigan chiqindixonada sanitariya-epidemiya holati yuzaga kelgan. Atrofi ochiq va devorlar tortilmagan turar joyda o‘nga yaqin daydi itlar ham bu yerda yashamoqda.
Ikki xonali nurab yotgan, deraza oynalari o‘rniga turli mato parchalari, plyonkalar, yarim singan shishalar qo‘yilgan bo‘lib, qish mavsumida nihoyatda sovib, yozda chidab bo‘lmaydigan darajada isib ketishi aniqlandi. Yashash binosi ichida o‘choqli oshxona joylashgan.
Ko‘mir va o‘tin yo‘qligi sababli, ovqat pishirish va uyni isitish uchun uy orqasidagi chiqindixonadan bolalar terib kelayotgan rezina parchalari, mayda shox-shabbalar, cho‘plar yoqilmoqda. Uning zaharli tutuni esa shundan ham murakkab vaziyatda yashayotgan odamlarning sog‘lig‘iga zararli ta’sir ko‘rsatayapti. Ichimlik suvi, tabiiy gaz yo‘q, atrofni yantoq va begona o‘tlar bosib yotibdi.
Ayniqsa, 2015-yilda tug‘ilgan Otabek, 2013-yilda tug‘ilgan Bahora, 2005-yilda tug‘ilgan Yahyobekning ust-boshi yupun, gigiyena holatlaridan yiroq, kasalmand va nimjon. Uy egalarining aytishicha, ular anchadan buyon to‘yib ovqatlanmagan.
Oqibatda bolalarning ijtimoiy moslashuvchanligi yo‘qolgan, muloqot qilish qobiliyati kuzatilmadi, bolalarga zudlik bilan ruhiy-psixologik, ma’naviy va iqtisodiy, tibbiy yordam ko‘rsatish zarurligi ayon bo‘ldi. Oilaning daromad olish manbasi yo‘q. Oila boshlig‘idan boshqa hech kim ishlamaydi. 13 yoshli Yahyobek 32-o‘rta maktabning 6-sinf o‘quvchisi bo‘lib, maktab mutasaddilari unga qishki kiyim-kechaklar olib bergan.
Aniqlanishicha, Pop tumanining “Mahalla” xayriya jamg‘armasi tomonidan mazkur oilaga 2016-yil dekabrda 500 ming so‘m, 2017-yil 150 ming so‘m yordam puli berilgan. Xonadon a’zolari doimiy ro‘yxatda “Chortoq” MFYda tursa-da, amalda “Nurobod” MFY hududida yashayotgani sababli moddiy yordam yoki farzandlari uchun tegishli tartibga muvofiq nafaqa pulini ololmayapti.
“Chortoq” MFY maslahatchisi Halima Qo‘chqorovaning aytishicha, 1995—1996-yillarda oilaga 12 sotixli yer uchastkasi ajratilgan. Ammo noma’lum sababga ko‘ra, ushbu yer uchastkasi sotilib, Pop tumanidagi sobiq Xalqabod shaharchasi hududidagi ko‘p qavatli uylardan xonadon sotib olingan. Keyinchalik uni ham sotishgan va MTP hududida qorovul bo‘lib ishlagan Martavali Botirov oilasini bu yerga ko‘chirib olib kelishgan.
Oila vakillari Pop tumani 3-sektori hududida bo‘lib, IIB boshlig‘i S.Abdulhamidov ular holidan biror marotaba xabar olmaganini aytib o‘tishdi. Qolaversa, pasport muammolari ham to‘liq hal qilinmagan.
Pop tumanida 2018-yilda uy-joyga muhtoj kam daromadli oilalarning 5 nafariga yashash uylari qurib berish rejalashtirilgan. Vaholanki, bu ro‘yxatdan mazkur oila joy olmagani aniqlandi.Mazkur mahallaga xizmat qiluvchi “Iskovut” qishloq oilaviy poliklinikasi mudiri Ilhomjon Anorqulov va uchastka shifokori Shirmonoy Hamraliyevaning aytishicha, oiladan hech kim sil kasalligi bo‘yicha ro‘yxatda turmaydi. Ammo, Martavali Botirov bir vaqtlar mazkur hisobda turgan va sog‘aygani sababli undan chiqarilgan.
Ishchi guruhi mazkur holat bo‘yicha to‘plangan ma’lumotlarni Respublika ishchi guruhi shtabiga taqdim etdi.
Izoh (0)