21 март куни Олмалиқ шаҳрида Тошкент вилоят аҳли ҳам Наврўз байрамини кенг тантаналар билан нишонлади. Бу ҳақда Тошкент вилояти ҳокимлиги Ахборот хизмати хабар берди.
Халқ сайли сифатида нишонланган ушбу байрам Олмалиқнинг «Олтин олма» хиёбони, «Ёшлар» боғи, «Болажон» истироҳат боғи ҳамда мазкур ҳудудларга туташ марказий кўчалар ва тўйхоналарда кенг тусда бўлиб ўтди.
100 нафар карнайчи ва сурнайчилар вилоятнинг жами 22 та шаҳар, туманларидан ташриф буюрган меҳмонларни байрамона куй-садолар остида кутиб олди. «Олтин олма» хиёбонида вилоятнинг ҳар бир шаҳар, туманлари ўзларига ажратилган павильонларда миллий қадриятларни акс эттирувчи анъаналарни намойиш этиб, куй-қўшиқлар ижро этди. Миллий таомлардан – сумалак, ҳалим, кўк сомса, чучвара, лочира, қатлама-ю чак-чак, ҳолва ҳамда тандирдан узилган иссиқ нонлар халққа улашилди.
Катта дошқозонда 5 тонна 500 кг дамланган байрам ошига 1 тонна 600 кг гўшт, 1 тонна 500 кг гуруч, 1 тонна 500 кг сабзи ва ёғ, пиёз ҳамда зироварлар солинди. Байрам оши тадбирга ташриф буюрганларга ва вилоятдаги муассасаларга — жами 48 000 одамларга тарқатилди. Байрам иштирокчиларининг ўз павильонларига улашиш учун 10 та махсус кичик ҳажмли автотранспорт воситалари (муравей) халқ хизматида бўлди.
«Болажон» истироҳат боғида Ёшлар иттифоқи Олмалиқ шаҳар кенгаши ҳамда Мактабгача таълим муассасалари ходимлари ҳамкорлигида тайёрланган бир-биридан қизиқарли томошалар, халқ ўйинлари, беллашув ва мусобақалар болаларга ҳақиқий байрам кайфиятини улашди. «Ёшлар» боғида китобхонлик, шеърхонлик, рассомчилик, ўймакорлик, каштачилик бўйича бўлиб ўтган чиқишлар ҳам томошабинларда чуқур таассурот қолдирди. Байрамда шунингдек, Ҳиндистондан ташриф буюрган ҳинд хонандаси томонидан куйланган қўшиқлар барчани ўзига мафтун этди.
Изоҳ (0)