Ўзбекистонда илк бор Наврўз айёми арафасида Осиё, Африка ва Европа давлатлари ўртасида Miss Union Fashion халқаро танлови бўлиб ўтди. Бу ҳақда «Nuz.uz» хабар бермоқда.
20 март куни «Зарқайнар» мода галереясида бўлиб ўтган танлов Miss Union лойиҳаси муаллифи, Gulnara Fashion компанияси асосчиси ва дизайнери Гулнора Муҳаммедова томонидан ташкиллаштирилди.
Лойиҳадан кўзда тутилган асосий мақсад Ўзбекистоннинг мода соҳасида имижини ошириш, мамлакатлар маданияти, анъаналари ва дизайнерлик ишлари билан танишиш, хорижлик сайёҳларни жалб этишдан иборат.
Лойиҳа бир неча йўналишдан иборат. Қизлар нафақат ташқи қиёфаси ёки саҳнада қадам ташлаши, балки миллий маданият, мода борасидаги билим ва тасаввурлари, мусиқа созларини чалиши ва ақлий қобилиятини намойиш этиши лозим. Ҳакамлар ҳайъати айнан мана шу параметрларга асосан иштирокчиларни баҳолади.
Танлов якунига кўра Гран-при Қозоғистон вакили Жания Саиджаъфар, биринчи ўрин ўзбекистонлик Сўғдиёна Рамизова, иккинчи ўрин туркиялик Фулден Човушўғли ва учинчи ўрин грециялик Лаура Иконому-Михайловага насиб этди.
Залдаги томошабинлар ўз овозларини Тожикистон вакили Муқаддас Беркиновага берди ва у Miss Audience номига муносиб кўрилди.
Ижтимоий тармоқлардаги онлайн овоз беришда татаристонлик Кристина Керимовага тенг келадиган топилмади: у Miss Online ва Miss Photomodel деб топилди.
Изоҳ (0)