Францияда ўн йил давомида чақалоқларининг жасадларини ўз оиласидан музлаткичда яшириб келган аёл устидан суд бошланди, деб ёзади The Local.
Янги туғилган чақалоқ жасадини аёлнинг икки қизидан бири уйда совитгич ичидан топиб олган. Топилма ҳақида у дарҳол отасига айтиб берган, эркак шу заҳоти полицияга мурожаат қилган.
Кейинроқ маълум бўлишича, бола топиб олинишидан 48 соатча аввал соппа-соғ ҳолда туғилган. Тиббий экспертизага кўра, у яшаб кетган бўларди. Тинтув чоғида полициячилар яна тўртта музлатилган жасадни аниқлади.
Шундан кейин ота-она ҳибсга олинди. Эркак жасадларни яширганликда ва ҳодиса ҳақида полицияга хабар бермаганликда айбланди. Бироқ кейинроқ айбловлар олиб ташланди: эркак 2005—2015 йиллар давомида хотини бир неча маротаба ҳомиладор бўлиб, кўзи ёриганидан бехабар эканлигини даъво қилди. Адвокатнинг сўзларига кўра, айни пайтда эркак рафиқасини қўллаб-қувватламоқда, у қилган қилмиши учун хотинидан дарғазаб эмас.
Суд 19 март куни, жасадлар топилганидан уч йил ўтиб бошланди. Судланувчи бутун умрлик қамоққа маҳкум қилиниши мумкин.
Изоҳ (0)