Профилактик ишлар ўз самарасини бериб, йиллар давомида қидирувда бўлганлиги сабабли чет элда яшириниб юрган шахслар терговга келтирилмоқда. Бу ҳақда Тошкент вилояти ИИБ ҳузуридаги Тергов бошқармаси маълум қилди, дея хабар берди ЎзА .
Қайд этилишича, 1977 йилда Паркент туманида туғилган Г.М. Жиноят кодексининг 135-моддаси (одам савдоси), 165-моддаси (товламачилик) ва бошқа моддаларида назарда тутилган жиноятларни содир этганликда сиртдан айбланиб, сиртдан қамоққа олиш тарзидаги эҳтиёт чораси танланган ҳолда унга нисбатан Паркент туман ИИБ томонидан 2012 йил 12 апрель куни қидирув эълон қилинган эди.
Қидирув ҳаракатлари давомида, Г.М бир неча йилдан буён Бирлашган Араб Амирликларининг Дубай шаҳрида яшаб юрганлиги, ўзига нисбатан қидирув эълон қилингани ва қамоққа олинишидан хавотирланиб, ўз юртига қайтиш ниятида эмаслиги аниқланди.
Туман прокуратураси, ИИБ ҳузуридаги Тергов бўлими ва жиноят-қидирув бўлими ходимлари ҳамкорликда Г.М.нинг яқин қариндошлари билан бир неча бор профилактик суҳбатлар ўтказди. Г.М. ўз ҳоҳиши билан тергов органига келган тақдирда, унга нисбатан танланган қамоққа олиш эҳтиёт чораси бошқа турдаги эҳтиёт чорасига алмаштирилишига кафолат берилиши тушунтирилганлиги натижасида 2018 йилнинг 9 март куни Г.М Ўзбекистонга қайтиб келишига эришилди.
Унга нисбатан 2012 йилда танланган қамоққа олиш тарзидаги эҳтиёт чораси бекор қилиниб, муносиб ҳулқ-атворда бўлиш ҳақидаги тилхат билан дастлабки тергов якунига қадар очиқликда қолдирилиши таъминланди. Ҳозирда Паркент туман ИИБ ҳузуридаги Тергов бўлими томонидан тергов ҳаракатлари давом эттирилмоқда.
Изоҳ (0)