Британия ҳудудида кимёвий қурол қўллашга буйруқни бевосита Россия президенти Владимир Путин берган бўлиши мумкин. Бу ҳақда Буюк Британия ташқи ишлар вазири Борис Жонсон маълум қилди, дея хабар беради Meduza.
«Унинг қарори билан Британия кўчаларида, Европада Иккинчи жаҳон урушидан сўнг илк бор асаб-фалаж моддаси қўллангани эҳтимоли юқори деб ҳисоблаймиз», — деди Жонсон.
Ўз навбатида, Путиннинг матбуот котиби Дмитрий Песков Россия президенти номи Скрипал иши муносабати билан тилга олинишини «шокка солувчи ва дипломатия нуқтаи назаридан кечириб бўлмас ҳолат» деб баҳолади.
Эслатиб ўтамиз, Буюк Британия расмийлари Солсбери шаҳрида 4 март куни ГРУ собиқ полковниги Сергей Скрипал ва унинг қизи Юлия заҳарланиши учун масъулиятни Россия зиммасига юклади. Жавоб чораси сифатида мамлакатдан россиялик 23 дипломатни чиқариб юбориш ва Москва билан олий даражадаги алоқаларни музлатишга қарор қилинди.
Изоҳ (0)