Туркия артиллерияси 16 март, эрта тонгдан буён Сурия шимолидаги Африн шаҳрини ўққа тутмоқда. Бу ҳақда, курдларнинг Firat агентлигига таяниб, «ТАСС» хабар берди.
Маълумотларга кўра, ал-Қадим, Ашрафия ва Маҳмудия туманларида камида 18 киши ҳалок бўлган.
Аҳоли истиқомат қиладиган даҳаларга сезиларли даражада зарар етган. Агентликнинг ёзишича, қулаб тушган бинолар остида жарогат олганлар бор. Курд Қизил ярим ой жамияти ходимлари кўнгиллилардан иборат бригада билан қутқарув ишларини олиб бормоқда.
Аввалроқ шаҳарни ҳимоя қилувчи курдларнинг «Халқ ўзини ўзи мудофаа қилиш кучлари»га турк авиацияси томонидан зарбалар берилганди. Firat’нинг ёзишича, бунда олти киши ҳалок бўлган.
Туркия қуролли кучлари бош штаби январь ойида «Халқ ўзини ўзи мудофаа қилиш кучлари» бўлинмалари ва «Демократик иттифоқ» партиясига мансуб курдларга қарши «Зайтун новдаси» номли ҳарбий операцияларни бошлаган эди.
Изоҳ (0)