15 март куни «Туркистон» саройида «Нуроний» жамғармаси республика бошқаруви томонидан ташкил этилган «Энг фаол кексалар ва фахрийлар ишлари бўйича маслаҳатчи» кўрик-танловнинг республика босқичи бўлиб ўтди. Бу ҳақда «Дарё»га жамғарма матбуот хизмати хабар берди.
Танловда иштирокчиларнинг кексалар ва фахрийлар ишлари бўйича маслаҳатчилари томонидан нуронийлар ва ёшлар ўртасида мулоқотлар ўтказиш, кенгаш ва жамғарма олдига қўйилган вазифалар ижросини таъминлаш, ижтимоий-маънавий муҳитни ўрганиш, ёшлар ўртасида ҳуқуқбузарликларнинг олдини олиш ҳамда оилаларда аҳиллик, тинчлик, осойишталик ва шукроналик билан ҳаёт кечиришни таъминлаш борасида олиб бораётган ишлари синовдан ўтказилди.
Натижаларга кўра, кўрик-танловнинг Қорақалпоғистон Республикаси, вилоятлар ва Тошкент шаҳри босқичида 14 нафардан маслаҳатчи биринчи, иккинчи ва учинчи ўринни эгаллаб, республика босқичига йўл олди. Қолган 158 нафари турли номинациялар бўйича тақдирланди.
Якуний босқичда қатнашган маслаҳатчиларнинг барчаси 60 ёшдан юқори бўлиб, олий маълумотга эга. Мутахассислиги бўйича уларнинг 6 нафари педагог, 3 нафари иқтисодчи, 2 нафари ҳуқуқшунос, 3 нафари бошқа касб эгалари ҳисобланади, дейилади хабарда.
Танловнинг якуний босқичи ғолиб ва совриндорлари Ўзбекистон фахрийларнинг ижтимоий фаолиятини қўллаб-қувватлаш «Нуроний» жамғармаси ҳамда фуқароларнинг ўзини ўзи бошқариш органлари фаолиятини мувофиқлаштириш бўйича ҳудудий кенгашлари томонидан қимматбаҳо совғалар билан тақдирланди.
Изоҳ (0)