Ўзбекистон ташқи савдо айланмаси январь—февраль ойларида салкам 4 миллиард долларни ташкил этди

Ўзбекистон ташқи савдо айланмаси январь—февраль ойида 3,9 миллиард долларни ташкил этди. Бу ҳақда Давлат статистика қўмитасининг маълумотларига таяниб, «Газета.uz» хабар берди.

Экспорт 1,5 миллиард долларни, импорт эса — 2,4 миллиард долларни ташкил этди. Ташқи савдо айланмаси минус 433,9 миллион долларга тенг бўлди. Энергия ташувчи ва нефть маҳсулотлари экспортлари ўтган йилнинг ушбу даврига нисабтан 2,7 баробарга ўсди, хусусан, таббий газ — 3,8 маротаба ўсган бўлса, машина ва қурилмалар экспортида 79,7 фоиз ўсиш кузатилди.

Озиқ-овқат маҳсулотлари экспорти ҳажми буғдой экспортининг 3,1 марта, мева-сабзавотлар экспортининг 36,9 фоизга ошиши ҳисобига 48,2 фоизга ўсди.

Экспортнинг 32,6 фоизини (486,1 миллион доллар) хизматлар, 23,2 фоизи — энергия ташувчи ва нефть маҳсулотлари (345,7 миллион), 8,4 фоиз — кимёвий маҳсулотлар (126,1 миллион), 7,4 фоиз — қора ва рангли металлар (110,4 миллион), 7 фоиз — озиқ-овқат маҳсулотлари (104,2 миллион), 3,1 фоиз — машина ва қурилмалар (46 миллион), 2,6 фоиз — пахта толаси (39,5 миллон) ҳамда 15,7 фоиз — бошқа товар ва хизматлар (234,7 миллион доллар) ташкил этди.

Импортнинг асосий улуши машина ва қурилмалар — 36,7 фоиз (893,2 миллион доллар) ва кимёвий маҳсулотлар — 14,9 фоиз (361,7 миллион) ташкил этди. Озиқ-овқат товарлари импорти — 13,2 фоизга (320,3 миллион), қора ва рангли металлар — 10,5 (255,3 миллион) фоизга, энергия ташувчи ва нефть маҳсулотлари — 7,7 (186,8 миллион) фоизга ҳамда хизматлар — 6,2 (261,2 миллион) фоизга тенг бўлди.

Январь—февраль ойларида ташқи савдо салдоси минус 939,4 миллион долларни, жумладан, МДҲ давлатларида — минус 401,4 миллион долларни, бошқа мамлакатлар билан эса минус 538 миллион долларни ташкил этди.

МДҲ мамлакатларидан асосий ташқи савдо ҳамкорлари Россия (25,6 фоиз), Қозоғистон(9,3 фоиз), Беларусь (2,1 фоиз), Украина (1,6 фоиз), Тожикистон (1,2 фоиз) ва Қирғизистон бўлиб, ташқи савдо айланмасининг 40,7 фоизи уларнинг улушига тўғри келади. Бошқа ҳамкор мамлакатлар — Хитой (22 фоиз), Туркия (5,8 фоиз), Жанубий Корея (4,8 фоиз), Афғонистон (2,4 фоиз) Германия (2,2 фоиз), Латвия (1,5 фоиз), АҚШ (1,1 фоиз) ва Ҳиндистон улушига ташқи савдо айланмасининг 40,9 фоизи тўғри келади.