Ўзбекистон ва Россия мутасаддилари қишлоқ хўжалиги машинасозлиги соҳасида ҳамкорликни мустаҳкамлаш масалаларини кўриб чиқди

Бош вазир ўринбосари – «Ўзагротехсаноатхолдинг» акциядорлик жамияти бошқаруви раиси Нодир Отажонов Россия саноат ва савдо вазирлиги қишлоқ хўжалиги машинасозлиги департаменти директори Евгений Корчевойни қабул қилди. Бу ҳақда вазирлик матбуот хизмати маълум қилди. 

Учрашув давомида томонлар қишлоқ хўжалиги техникаси, озиқ-овқат ва қайта ишлаш саноати учун жиҳозлар, шунингдек, қурилиш-йўл ва коммунал техникани етказиш масалаларини муҳокама қилди. Чирчиқ қишлоқ хўжалиги техникаси заводи ва «Ростсельмаш» заводи ўртасида ҳамкорликда ишлаб чиқаришни йўлга қўйиш бўйича келишувни амалга оширишга алоҳида эътибор қаратилди. 

Томонлар мазкур қўшма лойиҳанинг амалга оширилиши Ўзбекистонга хўжаликлар техник базасини модернизация қилиш, «Ростсельмаш» заводига эса нафақат Ўзбекистон, балки Марказий Осиёда ҳам ўз иштирокини кенгайтириш имконини беришини таъкидлади. 

Эслатиб ўтамиз, Президент Шавкат Мирзиёев ўтказган йиғилишда қишлоқ хўжалиги техникаси ишлаб чиқариш, сервис хизматини яхшилаш, импортни оптималлаштириш, экспортни кенгайтириш бўйича камчиликлар мавжудлиги, қишлоқ хўжалиги техникасининг маълум қисми эскиргани, уларни ўз вақтида янгилаш чоралари кўрилмагани қаттиқ танқид қилинганди.