Ўзбекистон Президенти Шавкат Мирзиёевнинг Тожикистонга давлат ташрифи доирасида «Ўзтрансгаз» АЖ ва «Тожиктрансгаз» ОАЖ ўртасида табиий газ етказиб бериш бўйича шартнома имзоланди. Бу ҳақда Тожикистон ҳукуматидаги манба маълум қилди, дея хабар беради Asia-Plus.
«Имзоланган ҳужжатга мувофиқ, Ўзбекистон 2018 йилда Тожикистонга умумий суммаси 15,1 миллион доллар бўлган 126 миллион кубометр табиий газ етказиб беради. 1000 кубометр газ учун 120 доллар нарх белгиланди, бу ҳозирда мавжуд дунё нархларидан икки баробардан кўпроқ арзон (1000 кубометр учун 227 доллар)», — таъкидлади манба.
Манбага кўра, Ўзбекистон қўшимча эҳтиёж туғилган тақдирда Тожикистонга етказиладиган табиий газ ҳажмини оширишга тайёр.
Маълумот учун, Ўзбекистон 2012 йилда Тожикистонга газ етказиб беришни тўхтатганди. Қўшни мамлакатдан импорт қилинадиган газнинг асосий истеъмолчилари «Тожик алюмин компанияси» давлат унитар корхонаси, Душанбе цемент заводи ва бошқа саноат корхоналари бўлган.
Изоҳ (0)