Энергетикани ривожлантириш соҳасидаги инновацион ғояларсиз, мамлакат раҳбарияти томонидан белгиланаётган модернизация бўйича барча режаларни амалга ошириб бўлмайди, деб ёзди Инновацион ривожланиш вазири ўринбосари Шерзод Шерматов Facebook’даги саҳифасида.
У илова қилган, Халқаро энергетика агентлиги (IEА) томонидан тақдим этилган графикда аҳоли бошига электр энергияси истеъмоли кўрсаткичи бўйича Ўзбекистон кўплаб қўшниларидан орқада эканлиги, шунингдек, у жорий даража 1990 йилги кўрсаткичдан анча паст бўлган камдан-кам мамлакатлардан бири эканлигини кўрсатади.
«Аҳоли сони ўсиши суръати сақланиб қолган тақдирда ва мутахассисларнинг электр энергияси ишлаб чиқарувчи корхоналарнинг ишга туширилиши борасидаги дастлабки прогнозларидан келиб чиқиб айтиш мумкинки, ҳатто 2025 йилга келиб ҳам, биз 1990 йилги кўрсаткич даражасига ҳам ета олмаймиз», — дея қайд этди вазир ўринбосари.
Унинг ёзишича, айнан ушбу кўрсаткич ҳақиқатда ўзгартирилмас экан, «ақлли шаҳарлар», «саноатлаштириш», «қулай инвестициявий иқлим яратиш», ахборот жамияти», «ҳудудларда тадбиркорликни ривожлантириш ва иш ўринлари яратиш» ҳақидаги гапларнинг барчаси қуруқ гап бўлиб қолиши мумкин.
«Бизда ягона энергетика вазирлиги йўқлигини ҳисобга олиб, барча манфаатдор бозор иштирокчилари («Ўзбекэнерго», «Ўзгидроэнерго», Энергия тежаш миллий компанияси) билан олимларни жалб этган ҳолда энергетика тармоғини ривожлантириш бўйича реал концепцияни биргаликда ишлаб чиқишга тайёрмиз… Ушбу масалага бепарво бўлмаган экспертларнинг барчасини қўшма ишчи гуруҳ фаолиятида қатнашишга таклиф қиламиз», — деб ёзди Шерзод Шерматов.
Изоҳ (0)