Жиззах вилоят ИИБнинг Миграция ва фуқароликни расмийлаштириш бошқармаси ходимлари имкониятлари чекланган ва ногиронлиги бўлган шахсларнинг биометрик паспортларини уларнинг уйларида расмийлаштирмоқда. Бу ҳақда вилоят ИИБ матбуот хизмати «Дарё»га маълум қилди.
Имконияти чекланган ва ногиронлиги бўлган фуқаролар учун ички ишлар идораларига келиб, биометрик паспортни расмийлаштириш маълум бир қийинчиликларни келтириб чиқариши мумкин. Шуни инобатга олган ҳолда, ИИБ ҳузуридаги Миграция ва фуқароликни расмийлаштириш бошқармаси ходимлари, мобил қурилмалардан фойдаланган ҳолда, шундай фуқароларимиз учун биометрик паспортларни расмийлаштириш ва ҳужжатни топшириш жараёнларини уларнинг уйларида амалга оширмоқда.Жиззах вилояти ИИБ матбуот хизмати
Қайд этишларича, худди шундай тадбирлар Жиззах вилояти Янгиобод туманидаги меҳнатга лаёқатсиз ва ногиронлиги бўлган фуқароларнинг хонадонларида бўлиб ўтган. Миграция ва фуқароликни расмийлаштириш бошқармаси ходимлари мобил воситалар ёрдамида уларга биометрик паспортларни расмийлаштирган.
Шунингдек, ушбу тадбирлар давомида фуқароларга паспортдан фойдаланиш қоидаларига риоя этиш, паспортдан фойдаланиш тартибини бузиш, вақтида қайд этмаслик каби ҳолатлар олдини олиш бўйича тушунтириш берилган.
Изоҳ (0)