Жорий йилнинг 1 мартидан суратга олиш ишлари бошланган Scorpion триллери ўзбек киносида янги даврни бошлаб бериши кутилмоқда, деб хабар берди ЎзА.
Хорижлик мутахассислар ҳам жалб этилган мазкур фильм ҳақида Ўзбекистон Ёшлар иттифоқи марказий кенгаши раиси Қаҳрамон Қуронбоев ижтимоий саҳифалари орқали қуйидаги фикрларни билдирган: «Бу ишлар тарихимизда биринчи маротаба ташкил қилинмоқда. Барчангизга омад тилайман. Натижаси билан берсин. Бу ёшлар ҳали кўп ишлар қилишига ишонамиз».
Эътиборли жиҳати шундаки, триллер учун хориждан тажрибали мутахассислар таклиф этилган. Ўзбекистонлик ёшлар улардан соҳа сирларини ўрганмоқда.
Суратга олиш майдонида актёрлар овози «тоза» ҳолда ёзилиб, қайта овозлаштирилмайди. Бу эса актёрлардан ўз ишига ўта жиддий ёндашиш, қаҳрамонининг ҳар бир сўзини ёдлаш, ҳис қилишни талаб этади. Россиядан лойиҳа учун Ўзбекистонга махсус ташриф буюрган мутахассислар фильм кадрларини суратга олиш майдонининг ўзида хомаки монтаж қилиб боради.
Фильм ижодий ва техник жамоасини Ўзбекистон, Россия, АҚШ ва Германия мутахассислари ташкил этади. Суратга олиш ишлари Тошкент шаҳри ва Бухоро вилояти, шунингдек, Россия ва Марокашда бўлиб ўтади.
Аввалроқ, мазкур фильмда туркиялик машҳур актёр Мурат Йилдиримнинг иштирок этиши катта шов-шувларга сабаб бўлганди.
Изоҳ (0)