Ўзбекистонда кутилаётган совуқ ҳаво, Эрон ва Непалдаги авиаҳалокатлар, кетма-кет тўртинчи ҳафта пасайган доллар курси ва куннинг бошқа муҳим хабарлари

12 мартнинг эътиборга молик янгиликлари — «Дарё»нинг кечки дайжестида.

1. Шавкат Мирзиёев 15 март куни Қозоғистонга ташриф буюради. 15 март куни Қозоғистоннинг Остона шаҳрида Қозоғистонда Ўзбекистон йилининг очилиши маросими бўлиб ўтади.

2. ТИВ: Ўзбекистон ва Тожикистон ўртасидаги 30 кунлик визасиз тартиб тегишли битим ратификациясидан сўнг кучга киради. Шартнома кучга кириш санаси қўшимча равишда эълон қилинади.

3. Ўзбекистонда доллар курси 23 сўмга пасайди. Долларнинг сўмга нисбатан курси кетма-кет тўртинчи ҳафта пасайди.

4. Ўзбекистонда ҳаво кескин совиб кетиши кутилмоқда. 14—16 март кунлари баъзи ҳудудларда ҳаво ҳарорати кечаси -7 даражагача совиши мумкин.

5. Непалда самолёт қулаши оқибатида 50 киши ҳалок бўлди. Эронда эса Мина Башаран ва унинг 7 нафар дугонаси бўлган самолёт бўлаклари топилди.

6. Дин ишлари бўйича қўмита ходими: «Вояга етмаганларнинг масжидга кириши тақиқланади». «Отаси билан бўлса ҳам мумкин эмас!», — деди арбоб, лекин, кузатувчиларнинг таъкидлашича, бу таъкид қонунга зид.

7. Мусулмонлар идорасининг Фатво бўлими бошлиғи рўмол ҳақида: «Энди буни муаммо ёки сиёсий тазйиқ деб талқин қилиш нотўғри». Ушбу масалани ҳал қилиш бўйича ҳозир ҳаракатлар бошланган.

8. Чемпионлар Лигаси: Сардор Рашидов собиқ жамоаси дарвозасига гол урди. Бироқ «Локомотив» бу сафар ҳам Қатар клубидан енгилди. Ўйин тақдири унинг якунидаги қандайдир тўрт дақиқа ичида ҳал бўлди.