Қибрайда 20 ёшли йигитни уриб юборган «Газель» ҳайдовчиси воқеа жойидан қочиб кетди. Жабрланувчи шифохонада вафот этди

9 март куни соат тахминан 23:10 ларда номаълум автомашина ҳайдовчиси Қибрай ҳудудида «Қибрай—Чинобод—Май» автомобиль йўлининг 1-километрида Чинобод маҳалласи томон ҳаракатланаётиб, ушбу йўналишда йўлнинг четида ҳаракатланиб кетаётган пиёдани уриб юбориб, жабрланувчини ҳаётини хавф остида қолдириб, воқеа жойидан қочиб кетган. Бу ҳақда «Дарё»га Тошкент вилояти ИИБ ЙҲХБ матбуот хизмати хабар берди.

Натижада 20 ёшли пиёда олган оғир тан жароҳатлари оқибатида касалхонада вафот этган.

«Автопатруль тун» тадбирига жалб этилган Тошкент вилояти ИИБ Йўл ҳаракати хавфсизлиги хизмати ходимларининг асосий эътибор мазкур жиноятни очишга қаратган.

Бошқа соҳавий хизмат ходимлари билан биргаликда олиб борилган тезкор қидирув ишлари натижасида 10 март куни автомобиль Қибрайдаги хонадонлардан биридан топилган. Аниқланишича, мазкур жиноятни 1984 йилда туғилган «Газель» автомашинасини ҳайдовчиси содир этган.

Айни вақтда тергов ишлари олиб борилмоқда.