Тошкент шаҳридаги Инҳа университети (IUT) ва Google корпорацияси қўшма ўқув дастурлари ва стартапларни қўллаб-қувватлаш орқали АТ-мутахассисларни тайёрлаш бўйича ҳамкорлик ўрнатиш масалалари муҳокама қилди, деб хабар беради университет матбуот хизмати.
IUT ректори Сарвар Бабохўжаев Google’нинг Туркия, Кавказ ва Марказий Осиёдаги дастурчилари билан ишлаш бўйича раҳбари Бариш Есугей билан музокаралар ўтказди.
11 март куни Бариш Есугей Тошкент шаҳридаги Инҳа университетига ташриф буюрди ҳамда Women Techmakers 2018 International Women’s Day Celebration (IWD) тадбирида иштирок этди.
Google вакили Ўзбекистондаги энг ёш университетлардан бирида талабалар ва ўқитувчилар учун яратилган шароит ва имкониятлар билан танишди.
Ўз навбатида, Бариш Есугей Ўзбекистондаги дастурчилар билан ҳамкорликни ривожлантириш режалари тўғрисида гапириб берди. Унинг қайд этишича, корпорация бўлинмалари минтақадаги ишлаб чиқарувчиларга, жумладан, ахборот ҳамда техник қўллаб-қувватлашни ҳам ўз ичига олган турли хил ёрдам кўрсатмоқда. Ушбу йўналишдаги асосий иш Google Developer Groups (GDG) деб аталувчи йўналишда олиб борилади.
Таъкидлаш лозимки, тахминан икки ҳафта олдин GDG Tashkent гуруҳи тузилган эди. Мазкур ҳамжамиятнинг ташкил этилишига Тошкент шаҳридаги Инҳа университети талабалари ташаббус кўрсатди. Ушбу гуруҳ Ўзбекистонда АТ таълим ва Google’нинг ечимларини ривожлантириш учун қатор тадбирларни амалга оширади. Бариш Есугей ўзи ва унинг жамоаси GDG Tashkent фаолиятини қўллаб-қувватлаши тўғрисида гапирди.
Учрашув давомида томонлар Google I/О, Women Techmakers, DevFest, Google Launchpad Accelerator ва шу каби турли хил тадбирларни ўтказиш орқали АТ соҳаси учун мутахассисларни тайёрлаш ҳамда қизларни АТ-соҳасига жалб этиш масалаларини муҳокама қилди.
Томонлар ишчи тартибда ҳамкорликнинг мумкин бўлган йўналишлари бўйича муҳокамаларни давом эттиришга келишиб олди.
Изоҳ (0)