Сурхондарёда шифохонадан салкам 22 миллионлик жиҳозларни ўғирлаб кетган шахс қўлга олинди

Сурхондарё вилояти сил касаллигига қарши кураш диспансери маъмурияти Термиз шаҳар ички ишлар бўлимига мазкур тиббиёт муассасасида ўғирлик содир бўлганини маълум қилди. Хабарга кўра, тунда номаълум шахс лаборатория бўлимидан қиймати салкам 9 миллион сўмлик «Twincubator — 7025009» русумли қон ўлчагич, 12,5 миллион сўмлик Primo star русумли микроскоп ускуналари, бир дона тефал ҳамда битта тиббий халатни ўмариб кетган, деб хабар берди ЎзА.

Тезкорлик билан олиб борилган қидирув ишлари натижасида лаборатория жиҳозларини тиббиёт муассасаси жойлашган Темир йўлчи маҳалласида яшовчи 40 ёшдаги Шокир Лайлиев (исм-шарифлар ўзгартирилган) ўғирлагани аниқланиб, ушланди ва ашёвий далиллар ҳужжатлаштириб олинди.

Бундан 6 йил муқаддам ҳам ўғрилик жинояти учун судланган Лайлиевга нисбатан Ўзбекистон Республикаси Жиноят Кодексининг 169-моддаси 4-қисми «б» банди билан жиноят иши қўзғатилди. Айни пайтда тергов-суриштирув ҳаракатлари олиб борилмоқда.