Шавкат Мирзиёев Душанбеда Тожикистон бош вазирини қабул қилди

Шавкат Мирзиёев Душанбе шаҳрида Тожикистон бош вазири Қоҳир Расулзодани қабул қилди, деб хабар берди Президент матбуот хизмати.

Учрашувда Шавкат Мирзиёев Ўзбекистон савдо-иқтисодий ҳамкорликни ривожлантиришга тайёрлигини, бунинг учун барча зарур шароит яратилишини таъкидлади.

Қоҳир Расулзода эса ўз навбатида Ўзбекистон билан Тожикистон ўртасида савдо-иқтисодий ҳамкорлик бўйича ҳукуматлараро комиссия ҳамраиси сифатида ўзаро манфаатли лойиҳаларни ишлаб чиқиш, қўшимча имкониятлар бўйича таклифлар тайёрлашга алоҳида аҳамият беришини қайд этди.

Икки мамлакат ҳудудлари ва етакчи корхоналари ўртасида кооперацияни кенгайтириш, қўшма корхоналар ташкил этиш, транзит юк ташишни кўпайтириш ва бошқа масалалар муҳокама қилинди.

Олий даражада эришилган келишувларни амалга ошириш бўйича «йўл харитаси» қабул қилиш муҳимлиги таъкидланди.

Аввалроқ, Шавкат Мирзиёев Тожикистон республикаси парламентининг Мажлиси намояндагон палатаси раиси Шукуржон Зуҳуров билан учрашгани ҳақида хабар берилганди.