Ички истеъмолнинг ўсишини ҳисобга олганда, 2020 йилга келиб, Ўзбекистонда аҳоли талабини қондириш учун газ қолмайди, дейилади «Kommersant.uz» Марказий Осиёнинг CENTIL консалтинг фирмаси материалларига таяниб тайёрлаган мақолада. Деярли барча мавжуд ГЭС ресурслари аллақачон электр энергияси ишлаб чиқаришга жалб қилинган, ва қўшнилардан ҳам электр энергиясини сотиб олиб бўлмайди — уларда ҳам етишмовчилик сезилмоқда.
Шунда атом электр станциясини барпо этишни таклиф қилиш ўринли бўлади. Битта шундай станция, масалан, Самарқанд, Бухоро ва Андижон вилоятлари аҳолисининг умумий эҳтиёжини тўлиқ қоплай олиши мумкин. АЭС учун ёқилғи масаласи эса ҳал деса бўлади — Ўзбекистон уран захиралари бўйича дунёнинг ўнта етакчи мамлакатлари сафига киради.
Аммо бу уранни АЭСда қўллаш учун тайёрлаш, яъни уни бойитиш керак бўлади. Ўзбекистонда уранни бойитиш бўйича корхоналар йўқ, шу сабабли жаҳон ишлаб чиқарувчиларига мурожаат қилишга тўғри келади, ва бу «Росатом» бўлиши эҳтимоли катта, дейилади хабарда.
Албатта, энг муҳим масала — хавфсизлик. Ўзбекистонда АЭС қуриш учун атом стандартларининг бутун бир тўпламини ишлаб чиқиш ва жорий қилиш, атом хавфсизлиги бўйича ўнлаб халқаро конвенцияларни ратификация қилиш зарур.
Ўзбекистонда АЭС қуриш масаласи очиқ бўлиб қолмоқда ва пухта ўйлаб, афзаллик ва камчиликларни тарозига солиб кўришни талаб қилади.
АЭСнинг пайдо бўлиши нафақат келажак авлодни энергия билан таъминлаш масаласини ҳал қилади, балки бошқа тармоқларнинг ривожланишини, саноат модернизациясини тезлаштиради ва ундан ҳам муҳими — фундаментал илм-фанга яхшигина туртки беради, дея хулоса қилинади мақолада.
Изоҳ (0)