Ўзбекистон Президенти Шавкат Мирзиёев «Автомобиль транспортини бошқариш тизимини янада такомиллаштириш чора-тадбирлари тўғрисида»ги қарорни имзолади.
Ҳужжатга мувофиқ, Ўзбекистон автомобиль ва дарё транспорти агентлигининг дарё транспорти соҳасидаги давлат бошқаруви бўйича ваколати Фавқулодда вазиятлар вазирлигига ўтказилди. Агентлик Ўзбекистон автомобиль транспорти агентлиги («Ўзавтотранс» агентлиги) этиб қайта номланди.
Автомобиль ва дарё транспортини ривожлантиришни норматив-техник таъминлаш Республика маркази «Ўзавтотранстехника» илмий-ишлаб чиқариш маркази» ДК, «Автодарётранс-илм» касб малакасини ошириш давлат илмий-методик маркази «Автомобиль транспорти кадрлари малакасини ошириш ва уларни қайта тайёрлаш институти» ДК деб қайта номланди.
Қорақалпоғистон Республикаси, вилоятлар ва Тошкент шаҳридаги шаҳар йўловчи транспортини бошқариш бўйича махсус ваколатли органлар «Ўзавтотранс» агентлигининг тегишли ҳудудий бошқармаларига бирлаштириладиган бўлди.
Олий ва ўрта махсус таълим вазирлигининг Нукус автомобиль йўл-хўжалиги ва хизмат кўрсатиш касб-ҳунар коллежи, Андижон транспорт ва хизматлар кўрсатиш касб-ҳунар коллежи ҳамда Самарқанд автомобиль ва йўллар касб-ҳунар коллежини, уларнинг таъминотини давлат бюджети маблағлари ҳисобидан молиялаштириш тартибини сақлаб қолган ҳолда, «Ўзавтотранс» агентлиги таркибига ўтказиш тўғрисидаги таклифига розилик берилди.
Илмий-тадқиқот ишлари, йўловчи автовокзаллари ва автостанциялари, умумий фойдаланишдаги йўловчи йўналишлари оралиқ бекатларини қуриш, реконструкция қилиш ва таъмирлаш бўйича дастурлар, автотранспорт воситаларини харид қилиш ва автомобиль транспортини бошқариш тизимига ахборот-коммуникация технологияларини жорий этиш, «Ўзавтотранс» агентлигини сақлашни молиялаштириш мақсадлари учун юридик шахс мақомига эга бўлмаган Ўзбекистон автомобиль транспорти агентлигининг Автомобиль транспортини ривожлантириш жамғармаси ташкил этилди.
2022 йилнинг 1 январигача бўлган муддатга:
Лизинг компаниялари ва халқаро ташувларни амалга оширувчи миллий ташувчилар Ўзбекистонга олиб кирилаётган ва мамлакатда ишлаб чиқарилиб харид қилинаётган юк автотранспорти воситаларини Ички ишлар вазирлиги органларида рўйхатдан ўтказишда Вазирлар Маҳкамаси ҳузуридаги Республика йўл жамғармасига ундириладиган йиғимлар тўловидан;
Асосий фаолияти автобусларда йўловчи ташишни амалга ошириш бўлган умумий фойдаланишдаги шаҳар йўловчи транспорти ташкилотлари ер солиғи тўловларидан озод этилди.
«Ўзавтотранс» агентлиги ва унинг томонидан ташкил этиладиган янги махсус корхоналар асослаш эҳтиёжи мавжуд бўлганда техник-иқтисодий асослаш асосида 2023 йилнинг 1 январигача бўлган муддатга барча турдаги солиқлар ва мақсадли давлат жамғармаларига ўтказиладиган мажбурий тўловлардан озод қилинди. Ўзбекистонга белгиланган тартибда тасдиқланган рўйхатлар бўйича олиб кириладиган транспорт воситалари, бутловчи анжомлар ва эҳтиёт қисмлар, ускуналар, асбоблар ва приборлар, машиналар ва механизмлар, компьютер ва диагностика техникаси учун божхона тўловларидан озод этилди (божхонада расмийлаштирувлар учун йиғимлар бундан мустасно).
«Ўзавтотранс» агентлиги ходимлари хизмат вазифаларини бажаришда идоравий формали кийим-бош кийиши белгиланди.
Хусусийлаштирилган корхоналарга кўмаклашиш ва рақобатни ривожлантириш давлат қўмитасига Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда икки ой муддатда «Ўзавтотранс» агентлиги ва унинг томонидан ташкил этиладиган янги мустақил ташкилотларга давлат тасарруфидаги автовокзаллар, автостанциялар, бинолар ва ишлаб чиқариш майдонларини бериш бўйича Вазирлар Маҳкамасига таклиф киритиш топширилди.
Изоҳ (0)