Ўзбекистон спорти тубдан ўзгаради. Президент ўз фармонида спорт ривожига тўсқинлик қилаётган 9 та тизимли муаммони санаб ўтди

Президент Шавкат Мирзиёев жисмоний тарбия ва спорт соҳасида давлат тизимини тубдан такомиллаштириш чора-тадбирлари тўғрисидаги фармонга имзо чекди.

Унда спортни ривожлантиришнинг мавжуд тизими талабга жавоб бермай қўйгани биринчи галда ўз ифодасини топган. Фармон матни спорт ва жисмоний тарбия соҳасида тизимли муаммолар, камчиликлар кўп эканини айтиш билан бошланган. Шунинг учун ҳам бу борада давлат сиёсатини самарали олиб боришнинг иложи йўқ, деб ёзилган. Кейин эса спорт ривожига тўсқинлик қилаётган масалалар санаб чиқилган.

Биринчи масала. Спорт бошқарувининг яхлит тизими мавжуд эмас, деб ёзилган фармонда. Яъни, соҳада давлат органлари ва бошқа ташкилотлар фаолияти мувофиқлаштирилмаган. Бу эса соғлом турмуш тарзини оммалаштириш ва тарғиб қилишни етарли даражада таъминламаяпти.

Иккинчи масала. Ўзбекистонда профессионал ва оммавий спортда эришилиши керак бўлган ютуқлар, марралар бор. Бироқ уларга эришиш йўлида спортни ривожлантириш концепцияси ишлаб чиқилмаган. Концепция эса ўрта ва узоқ муддатли истиқболни кўзлаб тузилиши шарт.

Учинчи масала. Спортнинг замонавий моддий-техник базаси, инфратузилмасини яратиш бўйича нодавлат сектор билан давлат ўртасидаги муносабатлар паст даражада. Бу аслида давлат-хусусий шериклик шартлари асосида вужудга келиши керак эди. Иш яхши йўлга қўйилмагани учун ҳам спортдаги муаммолар самарали ҳал бўлмаяпти.

Тўртинчи масала. Ёшлар орасидан иқтидорли спортчиларни танлаб олишнинг, яъни, селексиянинг самарали ҳамда шаффоф тизими мавжуд эмас. Терма жамоалар таркибини сифатли кадрлар билан тўлдириш учун — спорт захирасини шакллантириш ва юқори малакали спортчиларни тайёрлаш керак. Айнан селексия талаб даражасида эмаслиги, бунга тўсқинлик қилаётгани айтилган.

Бешинчи масала. Спортни ривожлантириш учун Ўзбекистонда малакали кадрлар етишмовчилиги бор. Чунки спорт кадрларидан тортиб, спорт ташкилотларини бошқарувчи кадрларни тайёрлаш, қайта тайёрлаш, малакасини оширишнинг мавжуд тизими яхши ишламаяпти, дейилади фармонда.

Олтинчи масала. Спортнинг давлат томонидан қўллаб-қувватланишида алоҳида турларгагина эътибор берилган, оқибатда бошқа олимпия спорт турлари назардан четда қолиб кетган. Айниқса, қишки спорт турларига бўлган қизиқиш кескин пасайиб кетган.

Еттинчи масала. Спортчиларни тайёрлашда уларнинг тиббий таъминотига, инновацион тадқиқотлари ва услубий ишланмаларига эътиборли бўлиш керак, дейилган. Замонавий талабларга жавоб берадиган стандартларининг мавжуд эмаслиги оқибатида бугунгача сифатли ўқув-машғулот жараёнининг йўлга қўйилиши таъминламагани кўрсатилган.

Саккизинчи масала. Спортни ривожлантиришга йўналтирилган молиявий маблағларнинг сарф этилишини назорат қилувчи механизм талаб даражасида ишламаслиги таъкидланган. Ваҳоланки, пулларнинг сарф этилиши асослими, улар ҳаққоний йўналтирилмоқдами каби масалалар назорат қилиб борилиши керак. Бу ҳолат спортда суистеъмолчиликка йўл қўймаслик учун ҳам шарт, дейилади.

Тўққизинчи масала. Ўзбекистонда халқаро стандартларга жавоб бера оладиган спорт асбоб-ускуналари ва инвентарларини ишлаб чиқариш йўлга қўйилмаган. Боиси, шу турдаги ишлаб чиқаришни қўллаб-қувватлайдиган механизмнинг ўзи йўқ.

Шавкат Мирзиёевнинг фармонида мана шу масалаларни тўғри йўлга қўйиш учун қилиниши керак бўлган ишлар кўрсатилган. Фармон матни МОҚ сайтида ҳам эълон қилинди.