Жанубий Кореянинг Hankook Mirae Technology компанияси 2016 йилда Method-2 номли вазни 1,6 тоннани, баландлиги эса қарийб тўрт метрни ташкил қиладиган роботни тақдим этган. Роботнинг яратувчиси Ян Чин Хонинг ҳисоблашича, ундан келажакда ҳалокат ва ёнғинларда қутқарувчи сифатида фойдаланиш мумкин. Бироқ уни ҳарбий операцияларда ҳам қўллаш мумкин. Унинг нархи 100 миллион долларга баҳоланмоқда, бироқ у ҳозирча сотилмайди, деб ёзмоқда TJournal.
3 март куни CNBC телеканалининг журналисти Эндрю Росс Соркин роботни синаб кўрди. Унинг ҳикоя қилишича, робот мустаҳкам тура олмайди ва махсус арқонлар билан шифтга маҳкамланган. Айни пайтда машина ташқи қувват манбаи ёрдамида ҳаракатга келади, келажакда эса қувват манбаи батареялар билан алмаштирилади.
Роботга чиқиш учун махсус нарвон бўйлаб кўтарилиш керак, унинг оёқларини муҳандис бошқаради. Роботни бошқарувчи эса фақат унинг қўлларини назорат қилиши мумкин. CNBC томонидан тақдим этилган видеода робот олдинга ва орқага бир нечта қадам ташлай олади. Компаниянинг ўзи томонидан аввал тақдим этилган видеода эса робот ўзининг атрофида айлана олар эди.
Журналистнинг фикрича, робот амалий жиҳатдан қўлланила олмайди. Унинг сўзларига кўра, роботлар учун одамлар томонидан камроқ бошқариладиган машина керак.
Изоҳ (0)