Украинада ўз жонига қасд қилган туркманистонлик талаба таълим олган олий ўқув даргоҳи раҳбариятига нисбатан жиноий иш очилди, деб хабар беради ЎзА.
Киев прокуратураси Богомолс номли миллий тиббиёт университети талабаси бўлмиш 19 ёшли туркманистонлик ўзбек қизи Муқаддас Насирлаеванинг ўз жонига қасд қилиш факти бўйича жиноий иш очди.
Қиз оиласининг адвокати берган маълумотга кўра, вақтинча яшаш муддатини узайтириш борасида ариза бериш олий ўқув юрти томонидан рад этилгач, талаба Киевдаги кўприкдан ўзини дарёга ташлаган. Унинг айтишича, хорижий талабалар билан ишлаш бўйича деканат ўз вақтида, вақтинча яшаш учун Муқаддаснинг ҳужжатларини миграция хизматига топширмаган.
Прокуратура, қиз 30 январь куни Киевдаги Патон кўпригидан ўзини ташлаб жонига қасд қилганини тасдиқлади.
Талаба қиз тенгдошларининг айтишича, у университетга 2017 йилда ўқишга кирган ва бунинг учун 7 синфдан тайёргарлик кўрган, у стоматолог бўлишни орзу қиларди. Улар қизни «мақсадга интилувчи ақлли ва қувноқ» инсон сифатида таърифладилар: у инглиз тили гуруҳида ўқирди ва гуруҳ раҳбари эди. Уларнинг таъкидлашларича, Муқаддас хорижий талабалар билан ишлаш бўйича декан ўринбосари Татьяна Тимохина ўртасида муаммо келиб чиққан.
«Муқаддаснинг ота-онаси вақтинчалик яшаш борасидаги муаммо тўғрисида билишарди. Унинг Украинадан чиқиб кетишини, янги виза билан қайтадан боришини, академик таътил олиб бир йилдан кейин ўқишни давом эттиришини айтишган эди. Туркманистоннинг Украинадаги элчихонаси Муқаддаснинг мамлакатда бўлиш муддати режимини бузгани учун жарима тўлаши кераклигини, бунинг учун эса университетдан мактуб лозимлигини айтишган. Буни ҳал қилиш борасида таклиф билан чиқилган. Бироқ деканат бунинг учун ҳеч нарса қилмади», – дейди Муқаддаснинг танишлари.
Университетда талабанинг миграция қонунчилиги билан муаммоси бўлгани тасдиқланди. Унинг виза муддати 2017 йил 17 декабрда тугаган эди. Шу сабабли ҳам у талабалар сафидан чиқарилган.
Изоҳ (0)