Наманганда ҳафтанинг ҳар шанба куни ҳокимнинг ёшлар билан учрашиши йўлга қўйилди

Наманган шаҳар ҳокими томонидан ҳафтанинг шанба куни ёшлар билан мулоқот ўтказиш, уларнинг муаммоларини ўрганиш анъанага айланиб улгурди. Бу ҳақда «Дарё»га шаҳар ҳокимлиги ахборот хизмати маълум қилди.

Шу кунга қадар уюшмаган ёшлар, муаммоли ёшлар, тадбиркор ёшлар, инновацион ғоя ва таклифлар эгалари билан учрашувлар ўтказилди. Уларнинг муаммоларини ҳал этиш, қийнаётган саволларига жавоб топишларига кўмак берилди.

Бу галги учрашув Наманган шаҳридаги ёш спортчилар билан бўлиб ўтди. Мулоқотни шаҳар ҳокими Шавкатжон Абдураззақов бошлаб берди. У миллий ва халқаро ареналарда спорт йўналишлари бўйича ғолиблик шоҳсупасини эгаллаган ёшларга миннатдорлик билдириб, интилишларини эътироф этди.

Спортчи ёшлар йўлларида тўғаноқ бўлаётган муаммоларини ҳокимга айтди, таклиф ва мулоҳазаларини билдирди. Муаммолар шу ернинг ўзида масъуллар иштирокида ўрганиб чиқилди, кўп вақт ҳамда маблағ талаб этмайдиган масалалар жойида бартараф этилди.

Тадбирда Республика, Осиё ва жаҳон чемпионларига ҳокимлик томонидан велосипед, спорт анжомлари ва либослари, бадиий китоблар, мураббийларга эса бир марталик пул мукофотлари тақдим этилди.

Ёшларнинг таклиф ва муаммоларини ўрганиш бўйича учрашувлар давом этади. Келгуси ҳафтада санъат соҳасидаги ёшлар билан учрашиш режалаштирилган.