Namangan shahar hokimi tomonidan haftaning shanba kuni yoshlar bilan muloqot o‘tkazish, ularning muammolarini o‘rganish an’anaga aylanib ulgurdi. Bu haqda “Daryo”ga shahar hokimligi axborot xizmati ma’lum qildi.
Shu kunga qadar uyushmagan yoshlar, muammoli yoshlar, tadbirkor yoshlar, innovatsion g‘oya va takliflar egalari bilan uchrashuvlar o‘tkazildi. Ularning muammolarini hal etish, qiynayotgan savollariga javob topishlariga ko‘mak berildi.
Bu galgi uchrashuv Namangan shahridagi yosh sportchilar bilan bo‘lib o‘tdi. Muloqotni shahar hokimi Shavkatjon Abdurazzaqov boshlab berdi. U milliy va xalqaro arenalarda sport yo‘nalishlari bo‘yicha g‘oliblik shohsupasini egallagan yoshlarga minnatdorlik bildirib, intilishlarini e’tirof etdi.
Sportchi yoshlar yo‘llarida to‘g‘anoq bo‘layotgan muammolarini hokimga aytdi, taklif va mulohazalarini bildirdi. Muammolar shu yerning o‘zida mas’ullar ishtirokida o‘rganib chiqildi, ko‘p vaqt hamda mablag‘ talab etmaydigan masalalar joyida bartaraf etildi.
Tadbirda Respublika, Osiyo va jahon chempionlariga hokimlik tomonidan velosiped, sport anjomlari va liboslari, badiiy kitoblar, murabbiylarga esa bir martalik pul mukofotlari taqdim etildi.
Yoshlarning taklif va muammolarini o‘rganish bo‘yicha uchrashuvlar davom etadi. Kelgusi haftada san’at sohasidagi yoshlar bilan uchrashish rejalashtirilgan.
Izoh (0)