2016 йилда Россиянинг Аргентинадаги элчихонасидан 389 кг кокаин топилган, деб ёзади «Газета.ru» Аргентина хавфсизлик вазири Патрисия Буллричга таяниб.
Унинг сўзларига кўра, 2016 йилнинг декабрида элчихона ҳуқуқ-тартибот органларига мурожаат қилиб, элчихона мактабида кокаин солинган бир нечта жомадон топилганини маълум қилган. Россия ва Аргентина махсус хизматлари қўшма операция ўтказиб, наркотикларни унга алмаштириб қўйган, жомадонларга эса GPS-трекерлар ўрнатган.
«Наркотиклар Россиягача етиб бормаган, у ерга ун етказилган», — деди Буллрич.
Полиция маълумотларига кўра, наркотикларни дипломатик почта орқали Россияга юбориш режалаштирилган. Уларнинг нархи қора бозорда қарийб 50 миллион еврога тенг бўлган. Маҳаллий ОАВлар маълумотлари бўйича наркотрафикка элчихона собиқ ҳисобчиси ва яна бир неча россияликлар алоқадор бўлган.
Изоҳ (0)