Нафақат Ҳиндистон, балки бутун дунё бўйича энг кўп ташриф буюриладиган сайёҳлик объектларидан бири, ХVII асрга тегишли мақбара — Тожмаҳал аста-секинлик билан вайрон бўлиб бормоқда, яқинда аниқланган фактлар эса ушбу ёдгорликнинг келажаги ҳақида жиддий бош қотиришга мажбур қилади, деб ёзади Travel Ask.
Тожмаҳалнинг ташқи деворлари ва гумбази оқ мармар билан қопланган бўлиб, у қуёшли кунда кўзни қамаштирадиган даражада оппоқ тусга кирса, уфқ нурлари остида қип-қизил тус олади, тунда эса ойнинг кумуш шуъласини акс эттиради.
Мажмуани асраб-авайлаш мақсадида уни ЮНЕСКОнинг жаҳон мероси объектлари рўйхатига киритишган. У мамлакатга катта даромад келтиради, чунки йилига ўн минглаб сайёҳларни жалб қилади. Мақбарага автомобилда яқин келиб бўлмайди: транспортни махсус тураргоҳда қолдириб, пиёда юришга тўғри келади. Бу ишланган газлар иншоотга салбий таъсир кўрсатмаслиги учун қилинган. Бундан ташқари, ёдгорликнинг оппоқ тусини бузмаслиги учун, мамлакат раҳбарияти Аградаги бир қатор саноат корхоналарини ёпиб қўйган.
Яқинда эса Тожмаҳал деворларида ёриқлар аниқланди. Олимлар бунга яқиндан оқиб ўтадиган Жамна дарёсининг саёзланиши сабаб бўлганини айтмоқда. Гап шундаки, Ҳиндистоннинг ушбу ҳудудида сўнгги йилларда иқлимнинг аридизацияси (намликнинг камайиши жараёни) кузатилмоқда: ёғинлар тобора камроқ тушмоқда, қурғоқчилик эса давомийроқ бўлиб бормоқда. Саёзланаётган дарё шунга олиб келдики, тупроқ тузилишида ўзгаришлар юз берди ва ер чўкиши кузатилди. Бу жараённи қандай тўхтатиш мумкинлигини мутахассислар ҳозирча билмаяпти, шу сабабли Тожмаҳалнинг бус-бутунлиги олимлар ва жамоатчилик орасида жиддий хавотирни келтириб чиқармоқда.
Изоҳ (0)