Миллий хавфсизлик хизмати Давлат чегараларини ҳимоя қилиш қўмитасининг ходимлари Қирғизистон ҳудудидаги Шоҳимардонсой дарёси орқали гиёҳванд моддаларни олиб ўтишга оид жиноят ишини бартараф этди. Бу ҳақда «Ўзбекистон 24» каналига таяниб, «Газета.uz» хабар берди.
10 февраль куни соат 23:30 да Фарғона тумани ҳудудидаги Водил қишлоғи бўйидаги Шоҳимардонсой дарёсидан ичида салкам 1 килограмм бўлган гашиш гиёҳвандлик моддаси мавжуд уч литрли полиэтилен идиш топилди.
Аниқланишича, мазкур «юк» Фарғона вилоятининг Бўстон қишлоғида яшовчи Ёдгор Эсоновга тегишли бўлган. Текширувлар жараёнида маълум бўлдики, Эсонов ўзининг ҳамқишлоғи Олим Ҳакимов ҳамда марғилонлик Рустам Қамбаров билан жиноий тил бириктириб, Қирғизистондан бўлган Олмос исмли фуқародан гиёҳванд моддаларни Шоҳимардонсой дарёси орқали қўшни мамлакатга ўтказишни келишиб олган.
Гиёҳванд модда пластик идишда бўлган, унинг ичидаги фонар эса маёқ вазифасини бажарган. Олим Ҳакимов ва Ёдгор Эсонов посилкани тутиб олиши керак бўлган, бироқ чегарачилар жиноят операциясини бартараф этишга муваффақ бўлган.
Бундан ташқари Ёдгор Эсонов қоровул бўлиб ишлайдиган «Агробанк» Фарғона вилояти бошқармасига тегишли дам олиш уйининг омборида ҳам тинтув ўтказилган. Омбордаги ўтинлар орасидан 1,8 килограммдан ортиқроқ гиёҳванд модда топилган.
Фарғона вилояти Миллий хавфсизлик хизмати жиноятчиларга нисбатан тегишли моддалар билан жиноят ишини қўзғатди.
Изоҳ (0)