Ўзбекистон Президенти Шавкат Мирзиёевнинг Бухоро вилоятига ташрифи доирасида 16 февраль куни Пешку туманида вилоят фаоллари иштирокида йиғилиш бўлиб ўтди. Шавкат Мирзиёев Сурхондарёга сафаридан бошланган анъана — вилоятнинг ҳар бир тумани бўйича ҳудуд фаолларининг Президентга мурожаатлари Бухорода ҳам давом этди.
Жумладан, Бухоро вилоятининг Қоракўл тумани вакиллари Шавкат Мирзиёевдан Ёмонжар каналининг Туркманистондан ўтган 4,5 километрлик қисмини Ўзбекистон ҳудудига ўтказишда ёрдам сўради.
«Туманимизнинг экин майдонларини сув билан таъминловчи Ёмонжар каналининг 4,5 километр масофадаги қисми қўшни Туркманистоннинг Лебап вилояти чегара ҳудудидан ўтиши сабабли, каналнинг ушбу қисмини тозалаш ва фойдаланишда катта муаммолар вужудга келмоқда. Каналнинг мазкур қисмини Ўзбекистон ҳудудига ўтказиш ва унинг 6,2 километрлик қисмини қайтадан таъмирлаш ўйлаб кўрилса, маъқул бўларди», — дея, қоракўллик оқсоқоллардан бири Президентга мурожаат этди.
Шавкат Мирзиёев бу муаммодан хабардор эканини билдириб, яқин вақт ичида сув иншоотларига тааллуқли катта қарор эълон қилинишини маълум қилди.
Бундан хабарим бор. Бугун сув иншоотлари бўйича жуда катта масалалар қўйилди. Бухоро вилояти учун қўшимча 300 миллиард сўмдан кўпроқ пул ажратилади. Яқинда биз қарор қабул қиламиз — Ёмонжар канали ҳам бу қарорда кўзда тутилган. Бош вазирнинг биринчи ўринбосари (Раматов)га топшириқ бердим, тез кунларда менга бу масала бўйича таклиф беради. Бу масала биринчилардан бўлиб кўриб чиқилиб, натижаси жойларга етказилиши керак.Шавкат Мирзиёев, Ўзбекистон Президенти
Изоҳ (0)