Оқ уй ходимлари девони раҳбари Жон Келли ва АҚШ махфий хизмати ходими АҚШ президенти Дональд Трампнинг ўтган йил ноябридаги Пекинга ташрифи чоғида давлат раҳбарининг «ядро жомадончаси» сабабли Хитой хавфсизлик хизмати вакиллари билан муштлашиб кетишига оз қолган. Бу ҳақда Axios ахборот портали вазиятдан хабардор манбаларига таяниб хабар берди, деб ёзади «ТАСС».
Ҳодиса президент делегациясининг Хитой пойтахтидаги Халқ йиғинлари саройига ташрифи чоғида юз берган. Ядро кодлари бўлган жомадончани ташиш учун жавоб берувчи махфий хизмат агентларидан бири делегациянинг қолган аъзолари билан биргаликда Хитой парламенти биносига кирмоқчи бўлган, аммо уни хавфсизлик хизмати вакиллари тўхтатиб қолган, шундан сўнг у Келлини чақирган. Келли эса агентга ҳамма билан бирга юришни буюрган.
Шунда Келли Хитой хавфсизлик хизмати вакилининг қўлини чангаллаб олган, у эса бунга жавобан уни кескин итариб юборган. «Ядро жомадончаси»ни кўтарган агент ҳам хитойлик соқчини итариб, ҳатто уни ерга қулатган.
Кейинроқ Хитой ҳукумати вакиллари Вашингтондан узр сўраб, воқеани босди-босди қилишни сўраган.
«Ядро жомадончаси» махфий кодлардан иборат қора сумка бўлиб, ушбу кодлар ёрдамида Америка етакчиси ядро зарбасини бериш ҳақида буйруқ бериши мумкин. Ушбу кодларни олиб юриш учун масъул бўлган махфий хизмат ходими ҳамма вақт президентнинг ёнида юришга мажбурдир.
Изоҳ (0)