Microsoft асосчиси Билл Гейтснинг фикрича, дунёнинг энг бадавлат кишилари бошқаларга қараганда кўпроқ солиқ тўлаши керак, деб ёзади «Meduza».
Гейтс мазкур фикрини CNN телеканалига берган интервьюсида АҚШ президенти Дональд Трамп маъмурияти томонидан маъқулланган солиқ ислоҳоти ҳақида гапираётиб айтиб ўтган.
«Мен шу пайтга қадар бошқаларга қараганда 10 миллиард доллар кўпроқ солиқ тўлаб келдим. Бироқ, ҳукумат молиявий аҳволи меники билан баравар фуқаролардан сезиларли даражада кўпроқ солиқ олиши керак», — дейди Гейтс.
Microsoft асосчисининг таъкидлашича, Трамп ислоҳотлари натижасида бадавлат инсонлар, ўртаҳол яшовчиларга нисбатан кўпроқ афзалликларга эга бўлади.
«Бу эса биз кўришни истаган — ижтимоий таъминот тизимини кучайтириш ва энг бадавлат кишилар учун юқорироқ солиқ тўловларини жорий этишга зиддир», — дейди Гейтс.
Билл Гейтс бир неча йиллар мобайнида дунёнинг энг бадавлат бизнесменлари рўйхатида етакчилик қилган. Forbes журнали унинг даромадини 90 миллиард доллардан кўпроққа баҳолаган.
Изоҳ (0)