Сурхондарёда 5-синф ўқувчиси Алишер Навоийнинг 450 дан ортиқ ғазалини тўлиқ ёд олди

12—13 февраль кунлари Навоий шаҳрида «Навоий ворислари» кўрик-танловининг Республика босқичи ўтказилди. Бу ҳақда кўрик-танлов ташкилотчилари «Дарё»га хабар берди.

Кўрик-танловда иштирокчилар тўртта шарт — энг кўп ғазал ёд олиш, ғазални бехато ва ифодали ўқиш, ғазал матнининг насрий баёнини ярата олиш, ундаги сўзлар мазмун-моҳиятини изоҳлаб бериш каби шартлар бўйича баҳслашди.

Сурхондарё вилояти Сариосиё туманидаги 5-мактабнинг 5-синф ўқувчиси Шахзодахон Раҳмонова Алишер Навоийнинг 457 та ғазалини ,шунингдек, шоирнинг яна қўшимча равишда «Лисон ут-тайр» (366 минг байтдан иборат) достонини яхлит ёд олгани аниқланди ҳамда унинг салоҳияти Навоийшунос мутахассислар ёрдамида жамоатчилик олдида яна бир бор имтиҳондан ўтказилди. Саҳнада мутахассислар томонидан иштирокчига Алишер Навоий девонидаги ғазалларнинг биргина сатрини ўқиб эшиттириб, уни давом эттириш шарти қўйилганда, Шахзода Раҳмонова ҳайъат аъзолари томонидан тақдим этилган мумтоз адабиёт намуналарини ҳали ҳайъат биринчи сатрини ўқиб улгурмасдан у бирорта хатосиз ғазалларни айтиб берди ва 5-синф ўқувчиси ушбу танловнинг мутлақ ғолиби ва кашфиёти деб эълон қилинди ҳамда энг олий мукофотга лойиқ, деб топилди.

Якуний натижаларга кўра, 1-ўринга Бухоро вилояти Ғиждувон туманидаги 30-сонли умумтаълим мактабининг 8-синф ўқувчиси Ситора Исоқова, Навоий вилояти Навбаҳор туманидаги 34-сонли умумтаълим мактабининг 9-синф ўқувчиси Маржона Нодирқулова 2-ўринга, Фарғона вилояти Учкўприк туманидаги 34-сонли мактабнинг 9-синф ўқувчиси Хосиятхон Сирожиддинова 3-ўринга лойиқ, деб топилди.

Тадбир якунида ғолибларга Ўзбекистон «Миллий тикланиш» демократик партияси ҳамда ҳамкор ташкилотлар томонидан диплом ҳамда қимматбаҳо эсдалик совғалари билан тақдирланди.

Навоий вилояти ҳокими Қобилжон Турсунов Навоий вилояти иштирокчиси Маржона Нодирқуловага Президент совғаси сифатида 50 000 000 сўм пул мукофотини тақдим этди ҳамда 14 февраль куни вилоят ҳокими Навбаҳор тумани ҳокими билан биргаликда танлов ғолиби таълим олган 34-сонли умумтаълим мактабида унга қимматбаҳо совғаларни топширди.

«Навоий ворислари» кўрик-танлови Ўзбекистон «Миллий тикланиш» демократик партияси марказий кенгаши ташаббуси билан ўтказилди.