Фарғонадаги 5 яшар қизалоқ Кибриёхоннинг ўлими жамоатчилик ўртасида қизғин муҳокамаларга сабаб бўлди. Бу воқеа ортидан интернетда ваҳимали миш-мишлар тарқалишга ҳам улгурди. Расмий ахборот манбалари томонидан бир неча бор баёнот берилганига қарамай, мазкур ҳодиса билан боғлиқ жумбоқлар етарлича. «Дарё» бу маъшум воқеа боғлиқ барча маълумотларни бир саҳифага жамлади.
Қотиллик
Кибриёхоннинг ота-онаси Туркияда ишлагани сабабли, у II гуруҳ ногирони бўлган бобоси ва бувиси қарамоғида яшаган. «Газета.uz»нинг тергов маълумотларига асосланиб хабар беришича, 5 февраль куни соат 16:00 атрофида боғча ҳамшираси М.Қодирова ўзининг икки фарзанди билан бирга қариндошининг 5 ёшли қизи Кибриёхонни олиб кетган.Ҳамшира уч болани уйдан 50 метр масофада қолдириб, ўз ишлари бўйича кетган. Бу ҳақда Кибриёхоннинг бувисини телефон орқали огоҳлантирган ва ундан болаларни уйига олиб киришни сўраган.
Бу вақтда 30—35 ёшлардаги велосипед минган эркак болаларга ширинлик олиб бериш баҳонасида улардан иккисини орқа ўриндиққа, бирини олдинга ўтқизган. Кўча бошигача боргач, эркак икки болани қолдирган ва қизчани ўзи билан олиб кетган.
Соат тахминан 17:00 да қизнинг бувиси ҳамширага болалар уйга келмаганлигини айтган. Кибриёхон йўқолиб қолганини билгач, оила аъзолари мустақил қидирув бошлаган ва бир соатдан сўнг ҳуқуқ-тартибот органларига мурожаат қилган.
Қидирув ишлари натижасида 6 февраль куни тахминан 00:20 да Оқбўйра қишлоғида Кибриёхоннинг тан жароҳатлари етказилган жасади топилган.
Биринчи гумонланувчи
Воқеа жамоатчиликка маълум бўлганидан сўнг кўп ўтмай, Telegram’даги @Oltiariq_tv каналида гувоҳларнинг кўрсатмалари асосида тайёрланган иккита фоторобот эълон қилинди.
9 февраль куни эса Қўштепа туманида истиқомат қилувчи О. А. гумонланувчи сифатида қўлга олинди. Ижтимоий тармоқларда гумонланувчининг сурати ва 5 ёшли Кибриёхонни олиб кетгани тахмин қилинган велосипед сурати пайдо бўлди.
Шу куни @Oltiariq_tv канали фойдаланувчилари ички ишлар органлари ходимлари гумонланувчини қотиллик юз берган жойга кўрсатма бериш учун олиб кетаётгани, уларнинг ортидан гумонланувчини калтаклашга тайёр оломон кетаётгани, ҳуқуқ-тартибот органлари ходимлари уларни тўхтатиб қолаётгани ҳақида аудиоёзувлар қолдирди.
Гумонланувчи қўлга олиниши билан бир вақтда интернет тармоғида фарғоналик беш ёшли қизчанинг ўлими тўғрисида «Эҳтиёт бўлинг! Ўзбекистонда болаларнинг органларини ўғирлаб кетаётган жиноий гуруҳ пайдо бўлди» мазмунидаги хабарлар пайдо бўлди. Ички ишлар вазирлиги эса бу хабарларни рад этиб, «Ўзбекистонда ёш болаларни ўғирлаётган жиноий гуруҳлар йўқлиги, фарғоналик қизчанинг барча ички аъзолари мавжуд бўлиб, олиб қўйиш ёки трансплантация ҳолатлари аниқланмагани»ни маълум қилди.
@Oltiariq_tv каналида ёзилишича, туман ИИБ ходимлари Кибриёхон билан бирга ўғирлаб кетилган икки қизчани биринчи гумонланувчи билан юзлаштирган. Қизчалар уни биринчи бор кўриб турганини айтган. 11 февраль куни гумон остида қўлга олинган шахснинг жиноий ишга алоқадорлиги ўз тасдиғини топмагани ва у қўйиб юборилгани ҳақида хабарлар пайдо бўлди.
Иккинчи гумонланувчи
15 февраль куни «Ёшлар» телеканалининг «Давр» информацион дастурида Кибриёхоннинг ўлими ҳақида лавҳа берилди. Унда қотиллик иши бўйича 14 февраль куни Фарғона вилоятининг Қўштепа тумани Қумтепа қишлоғида яшовчи фуқаро Абдураҳимов қўлга олингани маълум қилинди.Гумонланувчи Абдураҳимов билан боғлиқ тергов ҳаракатларида у ҳақиқатан ҳам 2018 йил 5 февраль куни вояга етмаган Кибриё Ғаффоралиевани унинг боғчаси олдидан велосипедга миндирган ҳолда олиб кетганлигини, уни ширинликлар олиб бераман деб алдаб, темирйўл кесишмаси олдига олиб бориб, қаровсиз ҳолда ташлаб кетганлигини тан олди, унинг ҳаракатлари тегишли далиллар билан ўз исботини топди. Ҳозирги вақтда гумонланувчи Абдураҳимов билан боғлиқ тергов ҳаракатлари давом этмоқда.Усмонали Мамаризаев, Олтиариқ тумани ИИБ катта терговчиси
«Давр»да намойиш этилган лавҳада гумонланувчининг исми ва ёшига аниқлик киритилмаган. Аммо ижтимоий тармоқларда гумондаги иккинчи шахс 1998 йилда туғилган Акмалжон Абдураҳимов эканлиги, у велосипедини бошқа рангга бўяб олгани айтилади. Эътиборли томони, ҳодиса юзасидан 16 февраль куни ЎзА сайтида эълон қилинган ахборотда ҳам гумонланувчининг 1998 йилда туғилгани, унинг исми-шарифи бош ҳарфлари А.А. экани қайд этилган.
Болаларни боғчадан ким олиб кетган?
Қотиллик содир бўлгани ҳақидаги илк хабарда 5 февраль куни соат 16:00 атрофида боғча ҳамшираси М.Қодирова ўзининг икки фарзанди билан бирга қариндошининг 5 ёшли қизи Кибриёхонни боғчадан олиб кетгани ва уйдан 50 метр масофада болаларни кўчада қолдиргани айтилади. «Давр»да намойиш этилган лавҳада эса Олтиариқ тумани ИИБ катта терговчиси Усмонали Мамаризаев гумонланувчи Абдураҳимов вояга етмаган Кибриё Ғаффоралиевани унинг боғчаси олдидан велосипедга миндирган ҳолда олиб кетганлигини тан олганини айтган.«Дарё» мухбири Муҳаммаджон Обидовнинг ҳуқуқ-тартибот идораларига яқин манбага таяниб хабар қилишича, боғча эшиги олдига видеокузатув камералари ўрнатилган. «Полосон» маҳалласида яшовчи аёл боғча ҳамшираси Кибриёхонни боғчадан унинг келинойиси олиб чиққанини айтган бўлса-да, аммо ўша куни электр ўчиб қолгани учун, қизалоқни боғчадан ким олиб чиқиб кетганини тасдиқловчи видеотасвир топилмаган.
Қотил аслида ким?
«Газета.uz»нинг тергов маълумотларига асосланиб берган хабарида Кибриёхоннинг тан жароҳатлари етказилган жасади 6 февраль куни соат 00:20 да Оқбўйра қишлоғидан топилгани ёзилган. ЎзА ҳам қизчанинг танасида жароҳатлар борлигини ёзган. ЎзАнинг қўшимча қилишича, қизалоқ 5 февраль куни соат тахминан 22:00 ларда «атроф қоронғи бўлишига қарамай, қаровсиз ҳолда ташлаб кетилган» (унинг соат 16:00 дан 22:00 гача қаерда бўлгани маълум эмас).«Давр»да чиқиш қилган фарғоналик терговчи ҳам «гумонланувчининг ўзи қизчани темирйўл кесишмаси олдига олиб бориб, қаровсиз ҳолда ташлаб кетганлигини тан олгани»ни айтди. Эътиборли томони, гумонланувчи қизалоқнинг жонига қасд қилганини эмас, айнан «боғчасидан олиб кетиб», сўнг «қаровсиз ташлаб кетганини тан олган».
Ўз навбатида, гумонланувчига нисбатан жиноят иши айнан қайси модда бўйича қўзғатилгани айтилмаётгани ҳам ташлаб кетилган вақтда Кибриёхон қандай аҳволда бўлгани, қотил кимлиги ҳақидаги саволлар ҳозирча жавобсизлигини кўрсатмоқда. Бу саволларга ҳали давом этаётган тергов давомида жавоб топилади.
Изоҳ (0)