14 февраль куни Қозоғистоннинг Ўзбекистондаги элчихонасининг янги биносида 2018 йилнинг 10 январь куни эълон қилинган Нурсултон Назарбоевнинг қозоқ халқига мурожаатномаси муҳокамасига бағишланган матбуот анжумани бўлиб ўтди.
Анжуманда давлат ва жамоат арбоблари, экспертлар ва оммавий ахборот воситалари ходимлари иштирок этди.
Қозоғистоннинг Ўзбекистондаги элчиси Ерик Утембаев тадбир иштирокчиларини Қозоғистонда ўтказилаётган ислоҳотлар кўлами ва аҳамияти, Ўзбекистон ва Қозоғистон ўртасидаги ўзаро ҳамкорлик алоқаларида эришилган муваффақиятлар билан таништирди.
Тадбирда шунингдек, МТРК раиси Алишер Хўжаев, Халқаро прес клуб раиси Шерзод Қудратхўжаев, Олий Мажлис Қонунчилик палатаси спикери ўринбосари Борий Алихоновлар нутқ сўзлади.
Маълумот учун, Қозоғистоннинг Ўзбекистондаги элчихонаси янги биноси 2013 йилда қурилган. Бинонинг тантанали очилиш маросими 2013 йилнинг 14 июнь куни Нурсултон Назарбоевнинг Ўзбекистондаги ташрифи доирасида бўлиб ўтган эди. Аммо, элчихона шу вақтга қадар эски биносида фаолият юритиб келаётган эди. Матбуот анжумани доирасида элчихона янги бинода иш бошлаши муносабати билан унинг яна бир рамзий очилиш маросими ҳам ўтказилди.
Изоҳ (0)