Наманган вилояти аҳолисига кўрсатилаётган офталмология ёрдамини янада такомиллаштириш мақсадида Республика ихтисослаштирилган кўз микрохирургия илмий-амалий тиббиёт маркази Наманган филиали ташкил этилади. Бу ҳақда Namangan Today хабар берди.
Статистик маълумотларга кўра, вилоят аҳолиси ўртасида биргина кўз катарактасини жарроҳлик йўли билан даволашга муҳтожлар сони 6 минг кишидан кўп. Вилоят кўп тармоқли тиббиёт марказининг кўз касалликлари бўлимида йилига уларнинг атиги 250-300 нафарига жарроҳлик амалиётлари ўтказиб келинмоқда. Қолган беморлар эса қўшни Андижон, Фарғона ҳамда пойтахт клиникаларига боришга мажбур бўлмоқда.
Болалар ва катталар ўртасида кўз жароҳатланиши юз берганда вилоят муассасаларида алоҳида шошилинч офталмология хизмати кўрсатувчи бўлим ташкил этилмаган. Оқибатда тунги пайтларда мурожаат этувчи беморлар вақтида ёрдам ололмаётганди. Энди бу муаммоларга барҳам берилади.
Филиал 80 ўринли бўлиши мўлжалланган. Бу ерда аҳолига юқори малакали ихтисослаштирилган тиббий ёрдам кўрсатиш билан бирга кўз касалликлари профилактикаси, диагностикаси ва даволашнинг замонавий илғор усуллари қўлланади. Аҳолига қулайлик яратиш мақсадида туну кун фаолият олиб борадиган шошилинч тез ёрдам пости ташкил қилинади.
Шаҳар ва туманлар марказий шифохоналари офталмология бўлимларига ташкилий-услубий, тиббий ёрдам кўрсатишнинг замонавий усуллари ва технологияларини амалиётга жорий этиш, зарур профилактик ишларнинг амалга оширилишига кўмаклашиш, сайёр консультациялар, «Маҳорат дарслари» уюштириш режалаштирилган.
Шунингдек, филиал тиббиёт ходимлари кўз касалликлари диагностикаси ва уларни даволашнинг замонавий усуллари бўйича Республика ихтисослаштирилган кўз микрохирургияси илмий-амалий тиббиёт маркази, Тошкент врачлар малакасини ошириш институти, Андижон ва Самарқанд давлат тиббиёт институтларининг офтальмология кафедраларида малака оширади.
Изоҳ (0)