Андижон шаҳрида Заҳириддин Муҳаммад Бобур таваллудининг 535 йиллиги муносабати билан халқаро илмий конференция бўлиб ўтди. Бу ҳақда «Дарё» мухбири Муҳаммаджон Обидов хабар берди.
Анжуманда Бобур номли халқаро жамоат фонди раиси Зокиржон Машрапов Ўзбекистон Президентининг «Қадимий ёзма манбаларни сақлаш, тадқиқ ва тарғиб қилиш тизимини янада такомиллаштириш чора-тадбирлари тўғрисида» ги қарори ижроси, 2017 йилда амалга оширилган ишлар ва 2018- йилги режалар ҳақида ҳисобот берди.
Таниқли бобуршунос олим Ваҳоб Рахмонов «Бобур абадияти» китобида чоп этилган илмий мақолаларни шарҳлади. Шоир Мирзо Кенжабекнинг «Мубайян ва насрий баёни», «Рисолаи Волидийя» назмий таржимаси ва шарҳи» ҳамда ёзувчи Омина Тожибоеванинг «Шамолларга учган нидолар» китобларининг тақдимоти бўлиб ўтди.
Эрон, Афғонистон, Япония, Туркия ва Қирғизистондан келган олимлар Бобур адабий меросини тарғиб қилиш ва бобуршуносликнинг долзарб вазифалари тўғрисида маъруза қилди.
Конференцияда Бобур номли халқаро жамоат фонди томонидан 2017 йилда «Бобур ва дунё» журнали таъсис этилгани, 20 дан зиёд мамлакат олимлари иштирокида халқаро конфенренсия ўтказилгани, «Бобурнома» араб ва испан тилларига таржима қилингани ҳамда «Бобур энциклопедияси»нинг иккинчи нашри чоп этилгани мамнуният билан эътироф этилди.
Зокиржон Машрапов Ўзбекистон Президенти Шавкат Мирзиёев 2017 йилда Андижон вилоятига ташрифи чоғида Боғи Бобурни кенгайтириш, бу ерда янги музей, кутубхона барпо этиш ҳақида кўрсатма бергани, бу ишлар 2018 йилда амалга оширилишини маълум қилди.
Изоҳ (0)