Ўзбекистон касаба уюшмалари федерацияси томонидан Хоразм вилоятида эҳтиёжманд оилалар вакилларига маиший техника жиҳозлари топширишга бағишланган тантанали маросим ташкил этилди. Бу ҳақда федерация матбуот хизмати хабар бермоқда.
«Ҳозирда Хоразм вилоятида эҳтиёжманд оилаларнинг 24 нафарини уй-жой билан таъминлаш, 120 нафарининг турар жойларини таъмирлаб бериш, 1332 нафарини маиший техника билан таъминлаш, тиббий хизматга муҳтож бўлган 72 нафар фуқаронинг саломатлигини тиклаш ишлари амалга оширилмоқда», — дейилади хабарда.
Хусусан, Урганч тумани ва Урганч шаҳридан 222 нафар эҳтиёжманд оилага маиший техника жиҳозлари – замонавий кир ювиш машиналари, газ плиталари, чангютгич ва кичик печлар топширилди.
«Мен ўн икки йилдан буён юра олмайман. Узоқ йиллар давомида уйдан чиқмай келдим. Ойнаи жаҳон орқали мамлакатимиз раҳбарининг маърузаларини тинглаб, биз каби ногирон инсонларга кўрсатаётган меҳр ва эътиборларини кўриб, ўзимда яшашга рағбат сездим. Қисқа бир йилда тикиш ва тўқишни ўргандим. Кичик ҳикоялар ёзяпман. Мени ҳаётга қайтарган президентимдан умрбод миннатдорман», — дейди «Байналмилалчи» маҳалла фуқаролар йиғинида яшовчи Зуҳра Озодбоева.
Изоҳ (0)