Молия вазирлигида Франциянинг Veolia компаниялар гуруҳи вакиллари қабул қилинди. Бу ҳақда вазирлик матбуот хизмати хабар бермоқда.
Музокаралар давомида Наманган шаҳрида иссиқлик ресурслари ва энергия истеъмолини бошқариш, хусусан, кўп қаватли уйларда яшовчи аҳоли хонадонларини иссиқлик энергияси билан тўлиқ таъминлаш масалалари муҳокама қилинди. 4-авлод марказлашган иссиқлик таъминоти тизимларининг замонавий ишланмалари, мониторинг тизими максимал даражада автоматлашган, масофали бошқариладиган, ёпиқ тизимли паст ҳароратда ишловчи ускуналарнинг қўллаш имкониятлари кўриб чиқилди.
Ресурсларни бошқаришни оптималлаштириш соҳасида Veolia компанияси жаҳонда етакчи ўринни эгаллайди. Компания ушбу соҳада 160 йилдан ортиқ иш тажрибасига эга бўлиб, бутун дунё бўйлаб фаолият юритаётган бўлинмаларида 163 минг ходим меҳнат қилади. Компания сув ресурслари, чиқиндилар ва энергия истеъмоли соҳасини бошқариш бўйича қарор ишлаб чиқади ва қабул қилади.
Ҳозирги босқичда Veolia компанияси Ўзбекистонда энергия ресурслари билан таъминлашнинг мавжуд тизимларини такомиллаштириш, уларни замонавий асосда қайта ташкил қилишга ўз ҳиссасини қўшишни режалаштирмоқда. Юқоридага вазифаларни мамлакатда илк маротаба қўлланилаётган, жаҳон андозаларига мос бўлган лойиҳа доирасида амалга ошириш кўзда тутилмоқда. Лойиҳани амалга ошириш жараёнида кўрсатилаётган коммунал ҳизматлар сифатини кескин ошириш, шаҳар хўжалигининг барқарор фаолият кўрсатишини таъминлаш учун зарур бўлган инновацион технологиялардан кенг фойдаланилади.
Дастлабки натижалардан келиб чиқиб, лойихани амалга ошириш тажрибаси республиканинг бошқа шаҳарларида ҳам жорий этилиши кўзланган. Мутаҳассисларнинг дастлабки ҳисоб-китобларига кўра, Наманган шаҳрида компания инновацияларини жорий этишдан кутиладиган самара қуйидагича бўлади:
Иссиқлик таъминоти кўрсаткичларининг кескин яхшиланиши, жумладан, энг юқори истеъмол даврида ҳам иссиқлик энергиясини барқарор узатилиши таъминланиши, авария ва фавқулодда вазиятлар бўйича тезкор чоралар кўриш ва уларнинг оқибатларини бартараф этиш;
Атмосферага зарарли чиқиндилар чиқарилишини сезиларли даражада қисқартириш ҳисобига экологик муҳитни яхшилаш;
Бир йилда 24,5 миллион куб метр табиий газни иқтисод қилиш, иқтисод қилинадиган табиий газни экспортга йўналтиришдан йилига 3,1 миллион доллар валюта тушумига эришиш.
Ушу лойиҳанинг мувофаққиятли амалга оширилиши Наманган шаҳрида амалга оширилаётган ижтимоий-иқтисодий ислоҳотларнинг устувор йўналишларидан бири бўлган аҳоли турмуш даражаси ва истеъмолчиларга хизмат кўрсатиш сифатини ошириш имконини беради.
Изоҳ (0)