Тошкент ахборот технологиялари университети Нукус филиали талабаси, ал-Хоразмий номидаги стипендия соҳиби Улбосин Сапарова кичик кучланишли қурилмалар учун қувватлантирувчи ускуна ихтиро қилди. Бу ҳақда ЎзА хабар бермоқда.
Мазкур ускуна (қувватлантириш блоки) электр токи манбаидан келиб турган 220 вольтли кучланишни 0 вольтдан 12 вольтгача ўзгармас кучланишга айлантириб беради. Хорижий давлатлардан келтирилган амалий технологик лабораториялар кичик кучланишни талаб қиладиган бўлса, ушбу қурилмадан фойдаланиш мумкин. У биргалашиб битта вазифани бажарадиган трансформатор, ўзгарувчан резистор, диод, плата, конденсатор, ТТ-905 маркали транзисторлардан иборат.
Қурилма қўл телефони батареясини қувватлантириб берувчи «тошбақа» деб номланадиган ускунага ўхшаб кетади. Лекин Улбосин яратган қурилмада қувватланиш даражасини қўл билан белгилаб олиш имконияти мавжуд ва ускуна ёрдамида соат ёки пульт учун махсус батареяларни ҳам қувватлантирса бўлади. Сабаби, бу каби кичик батареялар кам кучланишда (1,5-2 вольт) қувватланади.
Қурилманинг яна бир қулай томони — у орқали берилган кучланиш ўзгармас, яъни ток кучайиб-камайиб турган бўлса ҳам кучланиш белгилаб олинган даражадан ўзгармайди.
Изоҳ (0)