Ижтимоий тармоқларда «Андижонлик 23 яшар йигит милиция сўроғидан кейин ўз жонига қасд қилди» сарлавҳаси билан тарқатилган мақолада келтирилган ҳолатлар Андижон вилояти Ички ишлар бошқармаси томонидан ўрганилди, деб хабар беради ИИВ матбуот хизмати.
Ўрганиш жараёнида маълум бўлишича, фуқаро Исмоилжон Балтабаев ўз аризасида 2017 йилнинг февраль ойида ҳажга бориши юзасидан ёрдам бериш учун Абдураҳим Саттаровга 1700 доллар, 11 миллион сўм пуллари ва фуқаролик паспортини берганлигини, лекин Абдураҳим Саттаров турли баҳоналар билан зиёратга жўнатишга ёрдам бермасдан, пулларини ҳам қайтармаганлигини баён қилинган.
22 январь куни соат 18:25 да фуқаро Абдураҳим Саттаров тергов бўлимига чақиртирилиб, у билан суҳбат ўтказилганда Исмоилжон Балтабаевдан 1700 доллар 11 миллион сўм пулларини қарзга олганлигини ва пулларни қайтариш учун Қозоғистонга бориб ишлаб келганлигини билдириб, Исмоилжон Балтабаевнинг фуқаролик паспортини тергов бўлими суриштирувчиси Ғ. Исмоновга қайтариб берган.
Қўшимча терговга қадар текширув давомида фуқаро Абдураҳим Саттаровнинг фуқаролик паспортида 2017 йилнинг октябрь-ноябрь ойларида Қозоғистонга чиқиб келганлиги ҳақида қозоқ тилида ёзилган муҳр босилгани аниқланган. Муҳрнинг ҳақиқийлигини текшириш мақсадида Абдураҳим Саттаровнинг фуқаролик паспорти тегишли тартибда ҳужжатлаштирилиб олинган ва шу куни соат 18:45 да Андижон шаҳар ИИБ биносидан чиқариб юборилган.
23 январь куни соат 04:00 да Андижон вилояти тез тиббий ёрдам шифохонасидан Андижон шаҳар ИИБ навбатчилик қисмига келиб тушган хабарга асосан, Абдураҳим Саттаров яшаш хонадонида кўп миқдорда «Димедрол» таблеткаларини ичиб олганлиги ва ҳушсиз ҳолда оила аъзолари томонидан шифохонага олиб борилгани маълум бўлган.
Фуқаро Абдураҳим Саттаровга нисбатан Ўзбекистон Республикаси Жиноят кодексининг 168-моддаси (фирибгарлик) 1-қисми билан жиноят иши қўзғатилиб, дастлабки тергов ҳаракатлари олиб борилмоқда.
Изоҳ (0)