Ўзбекистон ва Россия ёшларининг иккинчи форуми иш бошлади

Ёшлар иттифоқи марказий кенгашида Ўзбекистон — Россия ёшлари иккинчи форумининг очилиш маросими бўлиб ўтди. Бу ҳақда ЎзА хабар бермоқда.

Форумда икки мамлакат делегациялари аъзолари, дипломатик корпус вакиллари, иқтидорли ёшлар иштирок этди.

Мазкур форум Ўзбекистон ёшлар иттифоқи билан Россия ёшлар иттифоқи ўртасида имзоланган ўзаро ҳамкорлик тўғрисидаги англашув меморандумига мувофиқ ўтказилмоқда. Анжуман икки давлат ёшлари ўртасидаги алоқаларни мустаҳкамлаш, Россия ёшлар иттифоқи вакиллари билан ўзаро ҳамкорликни ривожлантиришга хизмат қилади. Форум 12—18 февраль кунлари Тошкент, Самарқанд ва Бухоро шаҳарларида ўтказилиши белгиланган.

Тадбирда Ўзбекистон ёшлар иттифоқи марказий кенгаши раиси Қаҳрамон Қуронбоев, Россия ёшлар иттифоқи раиси Павел Краснокуцкий форум ёшлар ташкилотлари ўртасидаги ҳамкорликни янада кучайтириш, дўстона муносабатларни ривожлантиришга хизмат қилишини таъкидлади.

Форум доирасида икки давлат ёшлари ўртасида ўзаро мулоқот, тажриба алмашиш муҳитини яратиш, тадбиркорлик, туризм соҳаларини ривожлантириш истиқболлари, ёшлар ташкилотлари ўртасидаги ҳамкорликни кучайтириш бўйича қатор дастурларни муҳокама этиш мўлжалланмоқда.

Иштирокчилар Тошкент шаҳридаги Турин политехника университети технопарки ва Ёшлар ижод саройига ташриф буюради. Ёш ишлаб чиқарувчиларни қўллаб-қувватлаш ҳамда ёшлар сиёсатида фан ва таълим каби мавзуларда давра суҳбатлари ташкиллаштирилади.