Twitter’да фирибгарлар Трамп ва Маск номидан фойдаланиб, биткоинларни қўлга киритмоқда

Ўзини SpaceX компаниясининг раҳбари Илон Маск ва АҚШ президенти Дональд Трамп дея таништириб, Twitter ва бошқа ижтимоий тармоқ фойдаланувчиларининг криптовалюталарини қўлга киритаётган фирибгарлар пайдо бўлди, деб хабар берди «Газета.ru».

Хусусан улар @Eilon_Musk, @ElonMuski, @EloonMusk, @Elonn_Musk ва @Alon_Musk каби сохта аккаунтлардан фойдаланиб, уларнинг номидан твит ёзмоқда. Фирибгарлар ўз ҳисобига кичик қийматдаги криптовалютани ўтказишларини ва бунинг эвазига катта миқдорда мукофот беришларини айтиб, одамларни алдамоқда. Шу билан бирга, улар бу каби постларни машҳур кишилар ва мансабдор шахсларнинг расмий аккаунларига жойлашдан ҳам тортинмаяпти.

@ElonMuski биринчи бўлиб ижтимоий тармоқнинг 250 нафар фойдаланувчисига твитда кўрсатилган манзилга 0,2 биткоин ўтказиб, эвазига 250 бирликдаги криптовалютага эга бўлиш таклифини билдирди.

BuzzFeed News таҳлилларига кўра, фирибгарларнинг айнан шу мақсадда яратилган камида 27 та аккаунти аниқланган.